बीजिंग : १०० किलोमीटर क्रॉस-कंट्री पर्वतीय मॅरेथॉनमध्ये सहभागी झालेल्या २१ स्पर्धकांचा दुर्दैवी मृत्यू झाला आहे. चीनच्या उत्तर-पश्चिम भागामध्ये खराब हवामानामुळे हा प्रकार घडला आहे. अशी माहिती चीनची शासकीय वृत्तसंस्था शिन्हुआने दिली आहे. या मॅरेथॉन स्पर्धेमध्ये एकूण १७२ जण सहभाग घेतला होता. अन्य १५१ जण सुरक्षित असून त्यामधील आठ जण किरकोळ जखमी झाले आहेत.

चीनमध्ये क्रॉस-कंट्री पर्वतीय मॅरेथॉन स्पर्धेदरम्यान गांसु प्रांतात एक पर्यटन स्थळ असलेल्या यल्लो रिव्हर स्टोन फॉरेस्टमध्ये सहभागी झालेल्या धावपटूंना वेगवान वारे आणि हिम वर्षावाच्या आव्हानांचा सामना करावा लागला. या मॅरेथॉन स्पर्धेमध्ये एकूण १७२ स्पर्धकांनी सहभाग घेतला होता. यावेळी अचानक मॅरेथॉन मार्गावरील उंच भागातील २० ते ३१ किमी अंतरादरम्यानचे हवामान खराब झाले. या भागात जोरदार हिमवृ्ष्टी झाली आणि हवाही जोरात होती. वातावरणातील तापमान अचानकपणे कमी झाल्याने अनेक स्पर्धकांना त्रास झाला. काही स्पर्धक बेपत्ता झाल्याचे समोर आल्यानंतर स्पर्धा थांबवण्यात आली.

स्थानिक प्रशासनाच्या मदतीने बेपत्ता झालेल्या स्पर्धकांचा शोध घेण्यासाठी १२०० हून अधिक मदत आणि बचाव कार्याचे कर्मचारी प्रयत्न करत आहेत. या भागातील तापमानात पुन्हा घट झाली. त्यामुळे मदत आणि बचाव कार्य सुरू ठेवणे अधिकच आव्हानात्मक झाले. अशी माहिती बाइयिन शहराचे महापौर झांग शुचेन यांनी सांगितली आहे.