Priyanka Chopra: बॉलिवूडची देसी गर्ल अर्थात अभिनेत्री प्रियंका चोप्रा परदेशात राहत असली तरी ती आपली भारतीय संस्कृती आणि परंपरा विसरलेली नाही. भारतीय सण आणि उत्सव ती नेहमीच मोठ्या उत्साहात साजरे करताना दिसते. यंदाही प्रियंकाने पती निक जोनस आणि मुलगी मालती मेरी चोप्रा जोनससोबत दिवाळी साजरी केली. या खास सेलिब्रेशनचे काही सुंदर फोटो तिने सोशल मीडियावर शेअर केले आहेत. विशेष म्हणजे, प्रियंकाने दिवाळीनिमित्त आपले घर झेंडूच्या फुलांनी सजवले होते. तिच्या या खास अंदाजाने चाहत्यांचे लक्ष वेधून घेतले आहे.

निक आणि मालतीसोबत दिवाळीचा आनंद

प्रियंका चोप्राने नुकतेच लॉस एंजेलिस येथील आपल्या घरात दिवाळीनिमित्त आयोजित केलेल्या पार्टीचे काही फोटो चाहत्यांसोबत शेअर केले. या फोटोंमध्ये प्रियंका पती निक जोनस आणि मुलगी मालतीसोबत आनंदाचे क्षण घालवताना दिसत आहे. रविवारी तिने इन्स्टाग्रामवर या सेलिब्रेशनची झलक दाखवली.

या खास प्रसंगासाठी प्रियंकाने बरगंडी आणि सोनेरी रंगाचा सुंदर स्ट्रॅपलेस गाऊन परिधान केला होता. या गाऊनवर जरदोसी, मोती आणि सोनेरी धाग्यांची आकर्षक नक्षी होती. तिच्या लूकला कुंदनचा छोटासा मांगटिका, मोठे सोनेरी झुमके आणि बांगड्यांनी चारचाँद लावले होते. तिने केसांचा सुंदर अंबाडा बांधला होता. त्यामध्ये ताज्या पांढऱ्या गजऱ्याची सजावट केली होती.

दुसरीकडे निक जोनसने क्रीम आणि पांढऱ्या रंगाचा भरतकाम केलेला कुर्ता सेट परिधान केला होता. तर चिमुकली मालतीनेही वडिलांच्या कपड्यांशी जुळणारा पांढऱ्या रंगाचा लेहंगा घातला होता. तिघांचाही पारंपरिक अंदाज चाहत्यांना विशेष आवडला.

दिवाळीच्या फोटोंना दिले खास कॅप्शन

प्रियंकाने हे फोटो शेअर करताना खास कॅप्शनही लिहिले आहे. तिने म्हटले की, यंदाच्या दिवाळीच्या आठवणींमधील काही आवडते फोटो ती चाहत्यांसोबत शेअर करत आहे. तसेच सर्वांना दिवाळीच्या मनापासून शुभेच्छा दिल्या आहेत. तिच्या या पोस्टवर चाहत्यांनी लाइक्स आणि कमेंट्सचा वर्षाव केला. निक जोनसनेही पत्नीच्या पोस्टवर दिव्याचा आणि स्टार आयजचा इमोजी शेअर करत प्रतिक्रिया दिली.

 

View this post on Instagram

 

लेक मालतीला भारतीय संस्कृतीची ओळख करून देतेय प्रियंका

प्रियंका चोप्रा भारताबाहेर राहत असली तरी मुलगी मालतीला भारतीय सण, परंपरा आणि संस्कारांची ओळख करून देण्याचा ती नेहमी प्रयत्न करते. यापूर्वीही तिने अमेरिकेतील लॉस एंजेलिस येथे साजऱ्या केलेल्या दसऱ्याचे फोटो शेअर केले होते. या वेळी तिच्या घरी पूजा, शिवलिंग अभिषेक, हवन आणि कन्यापूजन असे धार्मिक विधी पार पडले होते.

या सेलिब्रेशनमधील एका फोटोमध्ये निक जोनस मालतीचे पाय धुताना दिसला होता. मालतीने आयव्हरी रंगाचे कपडे आणि त्यावर ‘जय माता दी’ असे लिहिलेली लाल रंगाची ओढणी परिधान केली होती. या फोटोंमधून प्रियंका आपल्या मुलीला भारतीय सण आणि परंपरांशी जोडून ठेवण्यासाठी किती प्रयत्न करते, हे पाहायला मिळाले होते.

निकने करवा चौथसाठीही टूरमध्ये केला बदल

प्रियंका आणि निक यांचे एकमेकांवरील प्रेम अनेकदा सोशल मीडियावर पाहायला मिळते. काही दिवसांपूर्वी दोघांनी लॉस एंजेलिसमध्ये करवा चौथ साजरा केला होता. विशेष म्हणजे, या सणासाठी निकने आपल्या सुरू असलेल्या म्युझिक टूरचे नियोजन अशा पद्धतीने केले होते की, त्याला करवा चौथच्या दिवशी प्रियंकासोबत घरी राहता येईल.

याबद्दल प्रियंकानेही सोशल मीडियावर पोस्ट शेअर केली होती. निकने आपण न सांगताच या सणाचे महत्त्व समजून घेतले आणि त्यानुसार आपल्या कामाचे नियोजन केले, असे तिने सांगितले होते. तसेच निकसारखा जोडीदार मिळणे ही आपल्यासाठी खास गोष्ट असल्याचेही तिने म्हटले होते.

‘वाराणसी’ चित्रपटातून पुन्हा येणार प्रेक्षकांच्या भेटीला

दरम्यान, प्रियंका चोप्राच्या आगामी चित्रपटाचीही सध्या चर्चा आहे. ती प्रसिद्ध दिग्दर्शक एस. एस. राजामौली यांच्या ‘वाराणसी’ या चित्रपटात दिसणार आहे. या चित्रपटात तिच्यासोबत अभिनेता महेश बाबू आणि पृथ्वीराज सुकुमारन यांच्याही महत्त्वाच्या भूमिका आहेत. हा चित्रपट ७ एप्रिल २०२७ रोजी चित्रपटगृहांमध्ये प्रदर्शित होणार आहे.

एकीकडे आंतरराष्ट्रीय स्तरावर आपल्या अभिनयाचा ठसा उमटवणारी प्रियंका, तर दुसरीकडे परदेशात राहूनही भारतीय सण आणि संस्कृती जपताना दिसते. तिच्या दिवाळी सेलिब्रेशनमधून हेच पुन्हा एकदा पाहायला मिळाले आहे.