नवी दिल्ली – देशभरात समान नागरी कायदा लागू करण्याचे सूतोवाच पंतप्रधान नरेंद्र मोदी यांच्याकडून करण्यात आल्यानंतर या मुद्‌द्‌यावरून अचानक राजकारण तापले असून प्रत्येक पक्षातून त्याची प्रतिक्रिया येते आहे. आता केरळचे मुख्यमंत्री आणि मार्क्‍सवादी कम्युनिस्ट पक्षाचे नेते पिनरई विजयन यांनीही समान नागरी कायदा म्हणजे भारतीय जनता पार्टीचा निवडणूक अजेंडा आहे अशा शब्दांत हल्लाबोल केला आहे.

शुक्रवारी याबाबतचे निवेदन जारी करून त्यांनी केंद्र सरकारला हे पाउल मागे घेण्याचे आवाहन केले आहे. सरकारच्या या कृतीमुळे देशाची बहुसांस्कृतिक विविधता संपुष्टात येईल. या गोष्टीकडे केवळ बहुमताची एक देश एक संस्कृती ही योजना राबवण्याचा अजेंडा म्हणूनच पाहता येऊ शकते.

या कायद्याच्या संदर्भात केंद्र सरकार आणि विधि आयोगाने जी पाउले उचलली आहेत ती मागे घेतली जावीत. या विषयाची आता चर्चा सुरू करणे म्हणजे राष्ट्रीय स्वयंसेवक संघाच्या सांप्रदायिक विभाजनाच्या अजेंड्याला बळकटी देण्याचा प्रकार आहे. भारताच्या विविधतेला हानी पोहोचवण्याचा अशा कोणत्याही प्रयत्नाचा विरोध केला जावा आणि विविध समुदायांमध्ये लोकशाही चर्चांच्या माध्यमांतून सुधारणांचे समर्थन केले जावे असे त्यांनी म्हटले आहे.