EPFO चा मोठा दिलासा! आता घरबसल्या PF खात्यातील नाव, जन्मतारीख दुरुस्त करता येणार; जाणून घ्या ५ सोप्या स्टेप्स
EPFO : EPFO ची ऑनलाइन जॉइंट डिक्लेरेशन सुविधा! PF खात्यातील नाव, जन्मतारीख आणि इतर माहिती घरबसल्या दुरुस्त करण्यासाठी या ५ सोप्या स्टेप्स जाणून घ्या. WhatsApp वर PF बॅलन्स तपासण्याची सुविधाही उपलब्ध.
EPFO New Update : कर्मचारी भविष्य निर्वाह निधी (EPF) खात्यातील नाव, जन्मतारीख, वडिलांचे नाव किंवा नोकरीशी संबंधित माहितीमध्ये चूक असल्यास ती दुरुस्त करण्यासाठी आता कार्यालयात जाण्याची गरज नाही. कर्मचारी भविष्य निर्वाह निधी संघटनेने (EPFO) ऑनलाइन जॉइंट डिक्लेरेशनची सुविधा उपलब्ध करून दिली आहे. यामुळे कर्मचारी घरबसल्या अवघ्या पाच टप्प्यांत आपल्या खात्यातील चुकीची माहिती दुरुस्त करण्यासाठी अर्ज करू शकतात. ही माहिती योग्य असणे महत्त्वाचे आहे. कारण चुकीच्या तपशिलांमुळे पीएफ क्लेम, पैसे ट्रान्सफर आणि पेन्शन मिळवताना अडचणी येऊ शकतात.
EPF खात्यातील माहिती दुरुस्त करण्यासाठी ५ सोप्या स्टेप्स
EPFO मेंबर पोर्टलवर जाऊन पुढील पद्धतीने दुरुस्तीची विनंती करता येते.
१. EPFO पोर्टलवर लॉगिन करा : सर्वप्रथम EPFO च्या अधिकृत मेंबर पोर्टलला भेट द्या. येथे आपला UAN (युनिव्हर्सल अकाउंट नंबर), पासवर्ड आणि कॅप्चा टाकून लॉगिन करा.
२. जॉइंट डिक्लेरेशन पर्याय निवडा : लॉगिन केल्यानंतर मेन्यूमध्ये असलेल्या ‘Joint Declaration Facility’ या पर्यायावर क्लिक करा. यानंतर माहिती दुरुस्तीची प्रक्रिया सुरू होईल.
३. दुरुस्ती करायची माहिती निवडा : स्क्रीनवर दिसणाऱ्या वैयक्तिक किंवा नोकरीशी संबंधित तपशिलांमधून ज्या माहितीमध्ये बदल करायचा आहे, ती निवडा. यामध्ये नाव, जन्मतारीख, वडिलांचे नाव आणि नोकरी सुरू केल्याची तारीख यांचा समावेश असू शकतो.
४. योग्य माहिती भरा आणि कागदपत्रे अपलोड करा : आता संबंधित रकान्यात योग्य माहिती भरा. नावाचे स्पेलिंग आणि इतर तपशील काळजीपूर्वक तपासा. त्यानंतर आधार कार्ड, पॅन कार्ड, पासपोर्ट यांसारखी आवश्यक कागदपत्रे अपलोड करा.
५. अर्ज सबमिट करा : भरलेली सर्व माहिती पुन्हा तपासा आणि त्यानंतर ‘Submit’ बटणावर क्लिक करा. तुमचा अर्ज पुढील तपासणीसाठी पाठवला जाईल. त्यानंतर नियोक्ता आणि EPFO कडून आवश्यक पडताळणी केली जाईल.
ऑक्टोबरमध्ये २.३६ लाख तक्रारींचे निराकरण
दरम्यान, कामगार आणि रोजगार मंत्रालयाने दिलेल्या आकडेवारीनुसार, EPFO ने ऑक्टोबर २०२६ मध्ये राबवलेल्या ‘विशेष मोहीम ६’ अंतर्गत २ लाख ३६ हजार २१ तक्रारींचे निराकरण केले आहे. संस्थेने २ लाख ५ हजार तक्रारी सोडवण्याचे उद्दिष्ट ठेवले होते. मात्र, प्रत्यक्षात उद्दिष्टापेक्षा सुमारे १५ टक्के अधिक तक्रारींचे निराकरण करण्यात आले.
यापैकी २ लाख २ हजार ९८४ तक्रारी EPFO च्या EPFiGMS या तक्रार निवारण पोर्टलवरून सोडवण्यात आल्या. तर उर्वरित ३३ हजार ३७ तक्रारींचे निराकरण केंद्र सरकारच्या CPGRAMS पोर्टलच्या माध्यमातून करण्यात आले.
WhatsApp वरही तपासता येणार PF बॅलन्स
EPFO ने डिजिटल सेवा अधिक सोप्या करण्यासाठी WhatsApp सेवेचाही विस्तार केला आहे. या वेरिफाइड WhatsApp सेवेच्या माध्यमातून पीएफ खातेधारकांना काही महत्त्वाच्या सुविधा मिळू शकतात.
* आपल्या पीएफ खात्यातील शिल्लक रक्कम तपासता येते.
* अलीकडील पाच व्यवहारांची माहिती मिळवता येते.
* पीएफ पासबुकमधील तपशील पाहता येतात.
पीएफ खातेधारकांनी काय काळजी घ्यावी?
पीएफ खात्यातील वैयक्तिक माहिती अचूक असणे अत्यंत महत्त्वाचे आहे. नाव, जन्मतारीख किंवा इतर तपशिलांमध्ये चूक असल्यास भविष्यात पैसे काढताना, पीएफ ट्रान्सफर करताना किंवा पेन्शनचा लाभ घेताना अडचणी येऊ शकतात. त्यामुळे खातेधारकांनी वेळोवेळी आपल्या खात्यातील माहिती तपासावी. चूक आढळल्यास आवश्यक कागदपत्रांसह दुरुस्तीची विनंती करावी.
