EPFO ​​rules : नोकरी सोडल्यानंतर EPF खात्यावर लगेच व्याज मिळणे बंद होते, असा अनेकांचा समज आहे. मात्र, कर्मचारी भविष्य निर्वाह निधी संघटनेच्या (EPFO) नियमांनुसार प्रत्येक प्रकरणात असे होत नाही. कर्मचारी कोणत्या वयात नोकरी सोडतो किंवा निवृत्त होतो, यावर EPF खात्यावर व्याज किती काळ मिळेल हे ठरते.

55 वर्षांपूर्वी निवृत्ती घेतल्यास 58 वर्षांपर्यंत व्याज –

एखाद्या कर्मचाऱ्याने 55 वर्षे पूर्ण होण्यापूर्वी स्वेच्छानिवृत्ती घेतली, तरी EPF खात्यावरील व्याज तात्काळ बंद होत नाही. अशा परिस्थितीत केवळ निवृत्तीनंतर तीन वर्षे पूर्ण झाली म्हणून खाते निष्क्रिय मानून व्याज थांबवले जात नाही.

उदाहरणार्थ, एखाद्या कर्मचाऱ्याने 52 किंवा 50 वर्षांच्या वयात स्वेच्छानिवृत्ती घेतली, तर त्याच्या खात्यात नवीन EPF योगदान जमा होणार नाही. मात्र, आधी जमा असलेल्या रकमेला 58 वर्षांच्या वयापर्यंत व्याज मिळू शकते.

55 वर्षांनंतर निवृत्ती घेतल्यास वेगळा नियम –

कर्मचारी 55 वर्षे किंवा त्याहून अधिक वयात निवृत्त झाल्यास EPF खात्याबाबत वेगळा नियम लागू होतो. EPFOच्या माहितीनुसार, निवृत्तीनंतर 36 महिने म्हणजेच तीन वर्षांनंतर खाते निष्क्रिय होते. त्यानंतर खात्यावर व्याज मिळत नाही.

उदाहरणार्थ, 58 वर्षांच्या वयात निवृत्त झाल्यास तीन वर्षांपर्यंत म्हणजे 61 वर्षांपर्यंत व्याज मिळू शकते. त्याचप्रमाणे 60 वर्षांच्या वयात निवृत्ती घेतल्यास 63 वर्षांपर्यंत व्याज मिळू शकते.

मात्र, खाते निष्क्रिय झाल्याने त्यातील पैसे संपत नाहीत किंवा कर्मचाऱ्याचा त्या रकमेवरील हक्कही संपत नाही. लागू नियमांनुसार वैध दावा केल्यानंतर EPFमधील रक्कम मिळवता येते.

नोकरी बदलल्यास EPFचे काय करावे?

निवृत्ती न घेता दुसरी नोकरी स्वीकारली आणि नवीन कंपनी EPFच्या कक्षेत येत असेल, तर जुने EPF खाते तसेच ठेवणे योग्य नाही. अशा वेळी जुन्या खात्यातील रक्कम नवीन EPF खात्यात हस्तांतरित करण्याचा सल्ला EPFOकडून दिला जातो.

निवृत्तीनंतर लागू नियमांनुसार EPFची रक्कम काढता येते. नोकरी बदलल्यानंतर किंवा निवृत्तीनंतर UAN आणि EPFशी संबंधित नोंदी अद्ययावत ठेवणेही महत्त्वाचे आहे.

त्यामुळे नोकरी सोडण्यापूर्वी किंवा निवृत्तीनंतर EPF खात्यावर व्याज कधीपर्यंत मिळेल, हे आपल्या वय आणि निवृत्तीच्या परिस्थितीनुसार समजून घेणे आवश्यक आहे.