शिरूर : शिरूर येथील ग्रामीण रुग्णालयात मंगळवारी सकाळी कर्मचाऱ्यांशी झालेल्या धक्काबुक्की व शिवीगाळीच्या घटनेने आरोग्य सेवकांच्या सुरक्षेचा प्रश्न ऐरणीवर आला आहे. या घटनेच्या तीव्र निषेधार्थ रुग्णालयातील कर्मचाऱ्यांनी अर्धा तास कामबंद आंदोलन करत रुग्णालयात तातडीने सुरक्षेची व्यवस्था करण्यात यावी, अशी ठाम मागणी प्रशासनाकडे केली. याबाबत मिळालेल्या माहितीनुसार, ओपीडीची वेळ संपल्यानंतर एक इसम कर्मचारी किरण सोनवणे यांच्याजवळ आला. कामाबाबत चौकशी केल्यानंतर त्या इसमाने उडवाउडवीची उत्तरे देत अचानक शिवीगाळ सुरू केली. काही क्षणातच तो इसम कर्मचाऱ्यांच्या अंगावर धावून गेला व धक्काबुक्की केली. अचानक घडलेल्या या प्रकारामुळे रुग्णालयातील कर्मचारी घाबरून गेले. मात्र, अन्य कर्मचाऱ्यांनी तत्काळ हस्तक्षेप करत संबंधित इसमाला रुग्णालयाबाहेर काढले. या घटनेची माहिती मिळताच ग्रामीण रुग्णालयातील संपूर्ण कर्मचारी वर्गात तीव्र संताप व्यक्त करण्यात आला. आरोग्य सेवकांना कामाच्या ठिकाणी सुरक्षित वातावरण मिळाले पाहिजे, अन्यथा रुग्णसेवेवर त्याचा परिणाम होऊ शकतो, असा इशाराही यावेळी देण्यात आला. महाराष्ट्र गव्हर्नमेंट नर्सेस फेडरेशनचे पुणे जिल्हा उपाध्यक्ष संदीप लगडे व महाराष्ट्र नर्सेस फेडरेशनच्या अध्यक्ष इंदुमती थोरात यांच्या मार्गदर्शनाखाली स्टाफ नर्सेस, तांत्रिक कर्मचारी व अन्य कर्मचारी अशा एकूण २६ जणांनी अर्धा तास कामबंद आंदोलन केले. रुग्णालय परिसरात गृहरक्षक दलाचे जवान नेमण्यात यावेत, सीसीटीव्ही व सुरक्षा व्यवस्था मजबूत करावी, अशा प्रमुख मागण्या यावेळी करण्यात आल्या. आंदोलनात गजानन टीमकरे, सुनील कोतकर, शोभा गायकवाड, रोहिणी तांदूळकर, मंगल पवार, शीतल वाघमारे, गणेश हिंगे, कमल मनतोडे आदी कर्मचारी उपस्थित होते. प्रशासनाकडून योग्य ती सुरक्षा व्यवस्था करण्याचे आश्वासन मिळाल्यानंतर कर्मचाऱ्यांनी आंदोलन मागे घेतले, अशी माहिती संदीप लगडे यांनी दिली. दरम्यान, ग्रामीण रुग्णालयात यापूर्वीही सुरक्षेच्या प्रश्नांकडे दुर्लक्ष झाले असल्याचे कर्मचारी वर्गाचे म्हणणे असून, भविष्यात अशा घटना टाळण्यासाठी ठोस उपाययोजना करण्यात याव्यात, अशी मागणी पुन्हा एकदा जोर धरत आहे.
