प्रकाश गायकर Hospital Billing : महापालिकेच्या रुग्णालयांमध्ये रुग्णांकडून आकारण्यात येणाऱ्या बिलामध्ये कर्मचाऱ्यांनी गैरव्यवहार केल्याचा धक्कादायक प्रकार उघडकीस आला आहे. बिलावर एक रक्कम आणि कार्बन कॉपीवर वेगळीच रक्कम दाखवत लाखो रुपये लाटले आहेत. याकडे रुग्णालयातील वरिष्ठ अधिकाऱ्यांनीही दुर्लक्ष केल्याने कर्मचाऱ्यांनी भ्रष्टाचाराचा कळस गाठला आहे. पालिकेच्या आकुर्डी आणि भोसरी येथील रुग्णालयांमध्ये हा धक्कादायक आर्थिक गैरव्यवहार उघडकीस येत असून, याचा फटका थेट गोर-गरीब रुग्णांना बसत असल्याचे समोर आले आहे. शहरामध्ये महापालिकेने वैद्यकीय व्यवस्था चांगली देण्यासाठी नवीन रुग्णालयांची स्थापना केली आहे. महापालिकेच्या आठ मोठ्या रुग्णालयांसह सुमारे ३० दवाखान्यांमधून शहरातील गोर-गरीब रुग्णांवर उपचार केले जातात. त्यासाठी महापालिकेच्या वतीने कोट्यवधी रुपयांचा खर्च केला जातो. तर शहरातील गोर-गरीब रुग्णांना नाममात्र दराने वैद्यकीय सुविधा दिल्या जातात. वैद्यकीय सुविधा पुरविताना आस्थापनेवरील कर्मचारी कमी पडत असल्याने कंत्राटी कर्मचाऱ्यांची नियुक्ती करण्यात आली आहे. मात्र, या कर्मचाऱ्यांकडून गोर-गरीब रुग्णांच्या बिलात हात साफ करत आर्थिक गैरव्यवहार केला जात असल्याचे समोर आले आहे. यापूर्वी देखील पिंपरी येथील जिजामाता रुग्णालयामध्ये लिपिकाने आर्थिक गैरव्यवहार केला असल्याचा प्रकार समोर आला होता. त्याच्यावर कारवाई केल्यानंतर देखील शहरातील इतर रुग्णालयांमध्ये देखील आर्थिक गैरव्यवहार सुरूच आहे. आकुर्डी येथील ह.भ.प. प्रभाकर मल्हारराव कुटे मेमोरियल रुग्णालयामध्ये हा गैरव्यवहार समोर आला आहे. रुग्णांना देण्यात येणाऱ्या मूळ बिलावर पूर्ण रक्कम दाखवली जात असताना, त्याच बिलाच्या कार्बन कॉपीवर मात्र कमी रक्कम नोंदवली जात होती. म्हणजेच प्रत्यक्षात १०० रुपयांचे बिल असताना कार्बन कॉपीवर केवळ ३० रुपये दाखवून उर्वरित रक्कम स्वतःकडे वळवली जात असल्याची बाब समोर आली आहे. अशा प्रकारे दररोज अनेक रुग्णांकडून लहान-लहान रकमेच्या माध्यमातून तब्बल ९ लाखांचा अपहार केला असल्याचे समोर आले आहे. ही बाब रुग्णालय प्रमुखांच्या लक्षात आल्यानंतर त्यांनी त्याबाबतचा अहवाल महापालिकेच्या वैद्यकीय विभागाला पाठवला. त्यानंतर विभागाने महापालिकेच्या सर्वच रुग्णालयांची तपासणी करण्याचे आदेश दिले. त्यामध्ये नवीन भोसरी रुग्णालयामध्ये देखील अशाच पद्धतीने पैसे लाटल्याचा प्रकार समोर आला आहे. हा आकडा देखील लाखो रुपयांच्या घरात असून त्याबाबत चौकशी सुरू आहे. संपूर्ण बिलबुकांची चौकशी केल्यानंतर भोसरी रुग्णालयातील आकडा समोर येणार आहे. मात्र, प्रशासनाच्या दुर्लक्षामुळे रुग्णांच्या बिलातही अफरातफर करण्याचा सपाटा कर्मचाऱ्यांनी लावला आहे. त्यामुळे रुग्णांचे आर्थिक शोषण होत असतानाच महापालिकेची बदनामी देखील होत आहे. डिजिटल व्यवहाराला हरताळ या प्रकारामुळे महापालिकेच्या आरोग्य व्यवस्थेवर प्रश्नचिन्ह निर्माण झाले असून, तातडीने चौकशी करून संबंधित दोषींवर कठोर कारवाई करण्याची मागणी नागरिकांतून होत आहे. तसेच, बिलिंग प्रक्रियेमध्ये पारदर्शकता आणण्यासाठी डिजिटल पद्धतीचा अवलंब करण्याची गरजही व्यक्त केली जात आहे. एकीकडे स्मार्ट महापालिकेचा टेंभा मिरवत असताना महापालिकेला अद्याप रुग्णालयांमध्ये ऑनलाइन व्यवहार देखील करता आले नसल्याची खंत आहे. जिजामाता रुग्णालयातही घडला होता आर्थिक गैरव्यवहार जिजामाता रुग्णालयामध्ये उपचार शुल्कापोटी रुग्णांकडून घेतलेल्या पैशावर वैद्यकीय अधिकारी व लिपिकाने डल्ला मारला होता. शुल्कापोटी १८ लाख ६६ हजार ३५६ रुपये जमा झाले असताना बँकेत फक्त ८ लाख ८९ हजार ६६५ रुपये भरले होते. म्हणजेच, ९ लाख ७६ हजार ६९१ रुपयांचा भ्रष्टाचार झाला होता. त्यानंतर आता पुन्हा आकुर्डी आणि भोसरी रुग्णालयामध्ये देखील लाखो रुपयांचा आर्थिक गैरव्यवहार झाला असल्याचे समोर आले आहे. ‘आकुर्डी रुग्णालयामध्ये बिलांमध्ये अफरातफर केल्याचे समोर आले आहे. याबाबत वैद्यकीय विभागाकडे माहिती आली असता सर्वच रुग्णालयाची तपासणी केली. त्यामध्ये भोसरी रुग्णालयामध्ये देखील हा प्रकार घडला आहे. याबाबत चौकशी सुरू केली आहे. त्याचा अहवाल सामान्य प्रशासन विभागाला देण्यात येईल. त्यानंतर कारवाई करण्यात येईल.’ – डॉ. लक्ष्मण गोफणे, मुख्य आरोग्य वैद्यकीय अधिकारी. Vehicle purchases : गुढीपाडव्याच्या मुहूर्तावर वाहनखरेदीला जोर; इलेक्ट्रिक कार आणि दुचाकी वाहनांना पसंती असल्याने वाहन खरेदीचा उच्चांक