Electric Shock – बाणेर येथील प्रथमेश पार्क परिसरात झाडावरील आंबे काढताना हायटेंशन वीजवाहिनीला स्टील पाइप लागल्याने शॉर्टसर्किट होऊन ३१ वर्षीय तरुणाचा झाडावर अडकून मृत्यू झाल्याची दुर्घटना घडली. अग्निशमन दलाच्या जवानांनी तत्काळ घटनास्थळी धाव घेत सुमारे २५ फूट उंचीवर अडकलेल्या तरुणाला गंभीर अवस्थेत खाली काढले. बाणेर पोलिसांनी दिलेली माहिती अशी की, संबंधित तरुण आंब्याच्या झाडावर चढून स्टील पाइपने आंबे काढत होता. हा पाइप हायटेंशन इलेक्ट्रिक तारेला चिटकल्याने जोरदार शॉर्टसर्किट झाले, त्यामुळे तो झाडाच्या फांद्यांमध्ये अडकून पडला. अग्निशमन दलाने लॅडर, रोप, रस्सी आणि रेस्क्यू बेल्टच्या सहाय्याने अत्यंत सावधगिरीने बचावकार्य राबवले. जवानांनी सुमारे २५ फूट उंचीवर अडकलेल्या तरुणाला सुरक्षित खाली उतरवून पोलिसांच्या ताब्यात दिले, त्यानंतर त्याला खासगी रुग्णवाहिकेद्वारे उपचारासाठी रुग्णालयात रवाना करण्यात आले. परंतु, उपचारा दरम्यान त्याचा मृत्यू झाला. या मोहिमेत केंद्रप्रमुख शिवाजी मेमाणे, प्रभारी अधिकारी विष्णू राऊत तसेच फायरमन जवान ज्ञानेश्वर गायकवाड, राजेश भालचिम, संजय चौरे, विजय चव्हाण, सोनावळे आदी जवानांनी सहभाग घेतला. “आंब्याच्या हंगामात काही टोळ्या आंबे काढून देण्याचे काम करतात. तरुणाजवळील साहित्य पहाता, तो तशा प्रकारे काम करणारा दिसत आहे. आंब्याचे झाड हे सार्वजनिक ठिकाणचे आहे, त्याला आंबे काढायचे काम कोणी दिले होते? याचा तपास केला जात आहे.” – चंद्रशेखर सावंत, वरिष्ठ पोलीस निरीक्षक
