जालना : जागावाटपावरून आठवडाभर चाललेल्या तीव्र वाटाघाटींनंतर जालना महानगरपालिका निवडणुकीपूर्वी महायुतीची आघाडी तुटल्याचे दिसत आहे. सत्ताधारी घटक पक्षांनी या ठिकाणी स्वतंत्रपणे लढवण्याचा निर्णय घेतला आहे. मंगळवारी उमेदवारी अर्ज दाखल करण्याच्या शेवटच्या दिवशी भाजप, शिंदेसेना आणि राष्ट्रवादीने स्वतंत्रपणे निवडणूक लढवण्याचा निर्णय घेतल्याने ही आघाडी संपुष्टात आल्याचे स्पष्ट झाले आहे. उपमुख्यमंत्री अजित पवार यांच्या राष्ट्रवादीने सोमवारी रात्री स्वतंत्रपणे निवडणूक लढवण्याचा निर्णय जाहीर केला आहे. भाजप आणि शिंदेसेनेकडून आपल्या पक्षाच्या ताकदीकडे सातत्याने दुर्लक्ष केले जात असल्याचा आरोप राष्ट्रवादीने केला आहे. प्रसारमाध्यमांशी बोलताना राष्ट्रवादीचे जालना जिल्हाध्यक्ष अरविंद चव्हाण म्हणाले, भाजप आणि शिंदेसेनेचे नेते आमच्या पक्षाच्या प्रतिनिधींना आमंत्रित न करता जागावाटपाच्या बैठका घेत होते. आम्हाला योग्य तो मान दिला गेला नाही. आमच्या पक्षाच्या संघटनात्मक ताकदीकडे दुर्लक्ष करण्यात आले. त्यामुळे, आम्ही निवडणूक स्वतंत्रपणे लढवून आमची ताकद दाखवण्याचा निर्णय घेतला आहे. उमेदवारी अर्ज दाखल करण्याच्या शेवटच्या दिवशी भाजप आणि शिंदेसेना या दोन्ही पक्षांनी जालन्यात सर्व ६५ जागांवर उमेदवार उभे केले. यावरती भाजप नेते कैलाश गोरंट्याल म्हणाले, सुरुवातीला जागावाटपाच्या सूत्रावर चर्चा झाली असली तरी, शिंदेसेनेने आपल्या पक्षाच्या हक्काच्या काही जागांवर निवडणूक लढवण्याचा आग्रह धरल्याने मतभेद निर्माण झाले. कोणतेही एकमत होऊ शकले नाही, म्हणून आम्ही निवडणूक स्वतंत्रपणे लढवण्याचा निर्णय घेतला असल्याचे ते म्हणाले. याउलट, काँग्रेस, ठाकरेसेना आणि राष्ट्रवादी काँग्रेस(शप) यांच्या महाविकास आघाडीने आधीच जागावाटप निश्चित केले आहे. सूत्रांच्या माहितीनुसार, काँग्रेसला ४२, ठाकरेसेना १२ आणि राष्ट्रवादी (शप) पक्षाला ११ जागांसाठी एबी फॉर्म देण्यात आले आहेत. महायुतीमध्ये फूट पडल्याने आणि अनेक पक्ष स्वतंत्रपणे निवडणुकीच्या रिंगणात उतरल्याने जालना महानगरपालिका निवडणुकीत चुरशीची बहुपक्षीय लढत अपेक्षित आहे. उमेदवारी अर्ज मागे घेण्याची अंतिम तारीख २ जानेवारी आहे.
