इस्लामाबाद : पाकिस्तान आणि तुर्कीसह आठ प्रमुख मुस्लिम देश एका मुद्द्यावर इस्रायलविरुद्ध एकत्र आले आहेत. त्यांनी संयुक्त राष्ट्रांच्या पॅलेस्टिनी निर्वासितांसाठीच्या मदत आणि कार्य एजन्सीला (यूएनआरडब्लूए) जोरदार पाठिंबा दर्शविला आहे आणि या संस्थेच्या कार्यालयावर इस्रायली सैन्याने केलेल्या हल्ल्याचा निषेध केला आहे. अभूतपूर्व मानवीय संकटाच्या काळात गाझामध्ये यूएनआरडब्लूएची भूमिका अतुलनीय असल्याचे या देशांनी म्हटले आहे. पाकिस्तानच्या परराष्ट्र मंत्रालयाने शुक्रवारी यासंदर्भात एक संयुक्त निवेदन जारी केले. त्यामध्ये पाकिस्तान, इजिप्त, इंडोनेशिया, जॉर्डन, कतार, सौदी अरेबिया, तुर्की आणि संयुक्त अरब अमिरातीच्या परराष्ट्र मंत्र्यांनी पॅलेस्टिनी निर्वासितांच्या हक्कांचे आणि कल्याणाचे रक्षण करण्यात संयुक्त राष्ट्रांच्या या मदत आणि कार्य एजन्सीची भूमिका अपरिहार्य असल्याचे म्हणत पुन्हा एकदा त्याच्या आवश्यकतेची भूमिका मांडली. अनेक दशकांपासून यूएनआरडब्लूएने आंतरराष्ट्रीय समुदायाने सोपवलेली अद्वितीय जबाबदारी पार पाडली आहे. त्यांनी त्यांच्या अधिकारक्षेत्रातील लाखो पॅलेस्टिनी निर्वासितांना संरक्षण, शिक्षण, आरोग्य सेवा, सामाजिक सेवा आणि आपत्कालीन मदत प्रदान केली आहे असे निवेदनात म्हटले आहे. गाझा पट्टीतील अभूतपूर्व मानवीय संकटाच्या पार्श्वभूमीवर वितरण केंद्रांच्या नेटवर्कद्वारे मानवतावादी मदत पोहोचवण्यात यूएनआरडब्लूए किती महत्त्वाची भूमिका बजावत आहे यावर आठ देशांनी भर दिला. अन्न, मदत पुरवठा आणि मूलभूत गरजा गरजू लोकांपर्यंत न्याय्य आणि कार्यक्षमतेने पोहोचतील ही बाब यूएनआरडब्लूए सुनिश्चित करत असल्याकडे निवेदनात लक्ष वेधले आहे. यूएनआरडब्लूएच्या आदेशाचे तीन वर्षांसाठी नूतनीकरण करण्याचा संयुक्त राष्ट्र महासभेचा निर्णय आंतरराष्ट्रीय समुदायाचा एजन्सीच्या महत्त्वपूर्ण भूमिकेवर आणि तिच्या कामकाजाच्या सातत्यतेवर असलेला विश्वास दर्शवितो असे या देशांनी म्हटले आहे. गाझामधील निर्वासित समुदायांसाठी यूएनआरडब्लूएच्या शाळा आणि आरोग्य सुविधा जीवनरेखा आहेत आणि त्यांची भूमिका अतुलनीय आहे. पॅलेस्टिनी निर्वासितांच्या गरजा पूर्ण करण्यासाठी किंवा आवश्यक प्रमाणात सेवांचे सातत्य सुनिश्चित करण्यासाठी आवश्यक पायाभूत सुविधा, कौशल्य आणि घटनास्थळी उपस्थिती इतर कोणत्याही संस्थेकडे नाही याकडे लक्ष वेधण्यात आले आहे.
