Satara: शेतकर्‍यांना दिवाळीपूर्वी मदत देण्यासाठी प्रयत्न सुरु; पालकमंत्री शंभूराज देसाई
Satara जिल्ह्यातील दुष्काळी परिस्थिती, धरणांतील उपलब्ध पाणीसाठा, ऊस गळीत हंगाम आणि साखर कारखानदारांच्या अडचणी यासंदर्भात पालकमंत्री देसाई म्हणाले, ‘‘दिवाळी अवघ्या तीन आठवड्यांवर आली आहे.
Satara: दुष्काळी परिस्थितीमुळे आर्थिक अडचणीत सापडलेल्या शेतकर्‍यांची दिवाळी काळी होऊ देणार नाही. शेतकर्‍यांना दिवाळीपूर्वी पाच हजार रुपये अग्रिम मदत देण्याच्या दृष्टीने राज्य सरकारकडून प्रयत्न सुरू आहेत. मात्र, सुमारे सव्वा कोटी शेतकर्‍यांना ही मदत देण्यासाठी सहा हजार कोटी रुपयांची गरज असून, त्याबाबत विचारविनिमय सुरु आहे, अशी माहिती पालकमंत्री शंभूराज देसाई यांनी पत्रकार परिषदेत दिली.
जिल्ह्यातील दुष्काळी परिस्थिती, धरणांतील उपलब्ध पाणीसाठा, ऊस गळीत हंगाम आणि साखर कारखानदारांच्या अडचणी यासंदर्भात पालकमंत्री देसाई म्हणाले, ‘‘दिवाळी अवघ्या तीन आठवड्यांवर आली आहे. धरणांतील सध्याचा पाणीसाठा आणि ऑगस्ट 2027 पर्यंत पिण्यासाठी आवश्यक असणार्‍या पाण्याचे नियोजन करावे लागणार आहे. पाण्याचा उपलब्ध साठा आणि भविष्यातील गरज यांचा अंदाज घेतल्याशिवाय पाण्याबाबत कोणताही निर्णय घेता येणार नाही. याचा अर्थ दुसर्‍या जिल्ह्याला पाणी द्यायचे नाही, असा होत नाही. मात्र, पिण्याच्या पाण्याची गरज लक्षात घेऊनच निर्णय घ्यावा लागेल.’’
दुष्काळी परिस्थितीचा परिणाम ऊस उत्पादनावर होण्याची शक्यता असून, उसाच्या साखर उतार्‍यात दीड टक्क्याने घट होऊ शकते. त्यामुळे शेतकर्‍यांचे संभाव्य नुकसान भरून काढण्याबाबतही चर्चा सुरू आहे. साखर कारखानदारांनी यंदाचा गळीत हंगाम मुदतीपूर्वी सुरू केला आहे. दिवाळीच्या काळात साखरेची टंचाई जाणवू नये, यासाठी राज्य सरकारही पुढाकार घेत आहे. स्वाभिमानी शेतकरी संघटनेच्या आंदोलनाच्या पार्श्वभूमीवर कारखानदारांना गळीत हंगामाबाबत विचारपूर्वक भूमिका घ्यावी लागेल. शेतकरी, साखर कारखानदार आणि सर्वसामान्य नागरिक यांचे नुकसान होऊ नये, यासाठी प्रयत्न सुरू आहेत. आम्ही तीन मंत्री साखर कारखानदारीशी संबंधित आहोत. राज्यातील दुष्काळी परिस्थिती, कारखानदारांच्या अडचणी आणि सर्वसामान्यांची गैरसोय टाळण्याची सरकारची भूमिका या तिन्ही बाबींवर चर्चा सुरू असल्याचे ना. देसाई यांनी स्पष्ट केले.
जिल्हा बँकेची निवडणूक महायुती म्हणूनच लढणार
जिल्हा बँकेच्या निवडणुकीतील महायुतीच्या जागावाटपाबाबत श्री. देसाई म्हणाले, ‘‘महायुतीतील घटक पक्ष एकत्रितपणेच निवडणूक लढवणार आहे. सोसायटी मतदारसंघात मात्र कोणी कोणासाठी थांबणार नाही. दहापैकी एक जागा बिनविरोध झाली असून, उर्वरित नऊ जागांच्या वाटपाबाबत सार्वजनिक बांधकाममंत्री शिवेंद्रसिंहराजे भोसले आणि ग्रामविकासमंत्री मकरंद पाटील यांनी या चर्चेसाठी पुढाकार घेतला आहे. यापूर्वी दोन बैठका झाल्या आहेत. मात्र, दोन्ही नेत्यांच्या व्यस्ततेमुळे तिसरी बैठक होऊ शकली नाही. मकरंद पाटील जिल्ह्यात येत असून, लवकरच पुढील बैठक होईल आणि त्यानंतर जागावाटपाबाबत निर्णय घेतला जाईल.’’
