Oil Packet Sizes: आखाती देशातील युद्धाच्या झळा आता हळूहळू देशाला लागताना दिसून येत आहेत. कारण सरकारकडून मागच्या १० दिवसात पेट्रोल आणि डिझेलमध्ये चौथ्यांदा वाढ करण्यात आली. तर सीएनजीच्याही दरात वाढ करण्यात आली आहे. आता या सगळ्यात केंद्र सरकारकडून महागाईचा आणखी एक झटका देण्याची तयारी सुरु असल्याचे समोर आले आहे. केंद्र सरकारकडून आता खाद्यतेलाबाबत महत्वाचा निर्णय घेण्यात येणार असून त्यामुळे तुमच्या आमच्यावर त्याचा परिणाम होणार आहे.

आजपर्यंत खाद्यतेलाची पाकिटे बाजारात ६५० ग्रॅम, ७०० ग्रॅम, ८१० ग्रॅम आणि ८५० ग्रॅम अशा अनेक वेगवेगळ्या आकारांमध्ये विकली जातात. यामुळे ग्राहकांना किमतींची अचूक तुलना करणे अवघड जाते. या समस्येवर तोडगा काढण्यासाठी सरकार नवीन नियम लागू करण्याचा विचार करत असल्याचे सांगण्यात येत आहे.

ग्राहक व्यवहार विभागाच्या मते, खाद्यतेलाच्या पाकिटांसाठी प्रमाणित आकार निश्चित केले जाऊ शकतात. हे पाऊल कायदेशीर मापनशास्त्रानुसार उचलले जाणार आहे. नवीन नियम लागू झाल्यानंतर, पाकिटे २०० मिली, ५०० मिली, १ ते ५ लिटर, १५ लिटर किंवा किलोग्रॅम आणि २० लिटर किंवा २० किलोग्रॅम अशा निश्चित आकारांमध्ये उपलब्ध होतील.

उद्योग संघटनांनी चिंता व्यक्त केली Oil Packet Sizes:

अलीकडेच, ग्राहक व्यवहार सचिव निधी खरे यांच्या अध्यक्षतेखाली एक बैठक झाली, ज्यात खाद्यतेल उद्योगाशी संबंधित प्रमुख संघटनांनी सहभाग घेतला. या संघटनांनी बाजारात पाकिटांच्या आकारात वाढणाऱ्या विविधतेबद्दल चिंता व्यक्त केली.

उद्योग संघटनांचे म्हणणे आहे की, एकसमान प्रमाणित आकारामुळे ग्राहकांना तेलाच्या किमती समजणे आणि वेगवेगळ्या ब्रँडची तुलना करणे सोपे होईल. यामुळेच खाद्यतेलाच्या प्रमुख प्रकारांसाठी प्रमाणित पॅकेट आकारांवर एकमत झाले आहे.

लहान पॅकेट्स सध्या तरी वगळली जाऊ शकतात Oil Packet Sizes:

उद्योग संघटनांनी सुचवले आहे की, २०० मिली पेक्षा लहान पॅकेट्स या नियमावलीतून वगळण्यात यावीत. यामुळे कमी किमतीची लहान पॅकेट्स बाजारात उपलब्ध राहतील आणि ग्राहकांची गैरसोय दूर होईल.