आज दाखल करणार उमेदवारी अर्ज सातारा – कॉंग्रेस-राष्ट्रवादीचे उमेदवार खा.उदयनराजे मंगळवार दि.2 एप्रिल रोजी उमेदवारी अर्ज दाखल करणार आहेत. महायुतीकडून यापुर्वीच नरेंद्र पाटील यांनी शक्तीप्रदर्शन करून उमेदवारी अर्ज दाखल केला आहे. पार्श्वभूमीवर खा.उदयनराजे उमेदवारी अर्ज दाखल करणार असून ते कशाप्रकारे शक्तीप्रदर्शन करतात, याकडे जिल्ह्याचे लक्ष लागून राहिले आहे. मंगळवारी सकाळी 9 वाजता कॉंग्रेस-राष्ट्रवादीचे ज्येष्ठ नेते व आमदारांच्या उपस्थितीत गांधी मैदान येथून रॅलीला सुरूवात होणार आहे. त्यानंतर जिल्हाधिकारी कार्यालयात जावून उमेदवारी अर्ज दाखल करण्यात येणार आहे. दरम्यान, नरेंद्र पाटील यांनी उमेदवारी अर्ज दाखल करण्याच्या निमित्ताने साताऱ्यात केलेल्या शक्तीप्रदर्शनाने लक्ष वेधून घेतले होते. त्यामुळे साहजिकच पाटील यांना जोरदार प्रत्युत्तर देण्याची तयारी खा.उदयनराजे समर्थक करित आहेत. मतदारसंघातील कानाकोपऱ्यातून पदाधिकारी व कार्यकर्ते उमेदवारी अर्ज दाखल करण्यासाठी उपस्थित राहिले पाहिजेत, यासाठी आ.शशिकांत शिंदे व जिल्हाध्यक्ष सुनील माने यांचे प्रयत्न सुरू आहेत. खा.उदयनराजे यंदा तिसऱ्यांदा सातारा लोकसभा मतदारसंघातून लढवित आहेत. मात्र, मागील दोन निवडणूकीच्या तुलनेत यंदाच्या निवडणूकीत पाटील यांच्या निमित्ताने आव्हान निर्माण झालेले आहे. त्यामुळे साताऱ्याच्या होम पिचवर खा.उदयनराजे समर्थक जोरदार शक्तीप्रदर्शन करण्याच्या तयारीत असल्याचे सांगितले जात आहे.
