Durga Puja:  पश्चिम बंगालची राजधानी कोलकाता येथील चोरबागान दुर्गा उत्सव समितीच्या मंडपात शनिवारी संध्याकाळी दुर्गा पूजेच्या उत्सवादरम्यान झालेल्या चेंगराचेंगरीत किमान १९ जणांचा मृत्यू झाला आणि २५ जण जखमी झाले.

घडलेल्या दुर्घटनेत मृतांमध्ये दोन मुलांचा समावेश असल्याचे वृत्त आहे. हा अपघात महासप्तमीच्या दिवशी घडला, जेव्हा मंडपाला भेट देण्यासाठी मोठ्या संख्येने लोक जमले होते.

प्राथमिक माहितीनुसार, मुसळधार पाऊस, अरुंद रस्त्यावरील वाढती गर्दी, प्रवेश आणि बाहेर पडण्याच्या मार्गांबाबतचा गोंधळ आणि माइकवरून केलेली कथित चुकीची घोषणा या परिस्थितीला कारणीभूत असू शकतात. मात्र, अपघाताचे खरे कारण तपास पूर्ण झाल्यावरच स्पष्ट होईल.

गर्दीने भरलेला अरुंद रस्ता, पावसामुळे वाढलेला दाब Durga Puja: 

हा अपघात शनिवारी संध्याकाळी ७:१५ ते ७:४० च्या दरम्यान घडला. उत्तर कोलकातामधील अरुंद राधा माधव साहा लेनमध्ये मंडपात प्रवेश करण्यासाठी लोक जमले होते. त्याच वेळी पावसाचा जोर वाढला. पावसापासून वाचण्यासाठी, मंडपात आधीच असलेले भाविक, तसेच बाहेर उभे असलेले भाविक आत शिरण्याचा प्रयत्न करू लागले.

गर्दीचा दबाव वाढल्याने ढकलाढकली सुरू झाली. समोरच्या गर्दीने मार्ग अडवल्यामुळे मंडपातील लोकांना बाहेर पडणे कठीण झाले. प्रत्यक्षदर्शींच्या मते, बाहेर पडण्याच्या मार्गाजवळील पायऱ्यांवर अनेक जण पडले आणि मागून येणाऱ्या लोकांच्या गर्दीत चिरडले गेले.

या घटनेनंतर, मंडपातील दिवे बंद करण्यात आले आणि लोकांची ये-जा थांबवण्यात आली. सुरक्षेच्या कारणास्तव शहरातील इतर अनेक दुर्गा पूजा मंडपही बंद करण्यात आले.