Mrunal Thakur: आज, १ ऑगस्ट रोजी अभिनेत्री मृणाल ठाकूर  (Mrunal Thakur)   तिचा ३४ वा वाढदिवस साजरा करत आहे. आज बॉलिवूड आणि दाक्षिणात्य चित्रपटसृष्टीतील आघाडीच्या अभिनेत्रींपैकी एक असलेल्या मृणालचा प्रवास अजिबात सोपा नव्हता. अनेक नकार, संघर्ष, बॉडी शेमिंग आणि मानसिक तणावाचा सामना करत तिने स्वतःचं वेगळं स्थान निर्माण केलं. आज तिच्या वाढदिवसानिमित्त तिच्या प्रेरणादायी प्रवासावर एक नजर.

मृणाल ठाकूरचा जन्म एका सामान्य कुटुंबात झाला. तिचे वडील उदयसिंह ठाकूर बँकेत नोकरी करत होते, तर आई वंदना ठाकूर गृहिणी आहेत. मृणालला एक भाऊ आणि एक बहीण आहे. लहानपणापासूनच तिला पत्रकार होण्याची इच्छा होती. यासाठी तिने मुंबईतील महाविद्यालयात मीडिया अभ्यासक्रमाला प्रवेशही घेतला होता. मात्र, अभिनयाची संधी मिळाल्यानंतर तिने हा अभ्यासक्रम अर्धवट सोडून अभिनय क्षेत्रात करिअर करण्याचा निर्णय घेतला.   (Mrunal Thakur)

२०१२ मध्ये कॉलेजमध्ये शिकत असताना तिने सहज म्हणून एका मालिकेसाठी ऑडिशन दिलं आणि तिची निवड झाली. ‘मुझसे कुछ कहती… ये खामोशियां’ या मालिकेतून तिने अभिनय क्षेत्रात पदार्पण केलं. त्यानंतर अनेक मालिकांमध्ये ती झळकली. मात्र, ‘कुमकुम भाग्य’ मालिकेतील बुलबुल या भूमिकेमुळे तिला घराघरात ओळख मिळाली.

अभिनय क्षेत्रात सुरुवातीचा काळ मात्र तिच्यासाठी खूप कठीण होता. ऑडिशनसाठी ती मुंबई लोकलने प्रवास करत असे. अनेक वेळा नकार मिळाल्याने ती खचली होती. एका मुलाखतीत तिने सांगितलं होतं की, सतत मिळणाऱ्या नकारांमुळे आणि “तू अभिनेत्री होऊ शकत नाहीस” अशा बोलण्यामुळे ती मानसिकदृष्ट्या खूप अस्वस्थ झाली होती. त्या काळात तिच्या मनात स्वतःला इजा करण्याचे विचारही येत असत. मात्र, तिने हार न मानता स्वतःला सावरलं आणि आपल्या कामावर लक्ष केंद्रित केलं.   (Mrunal Thakur)

 

 

मृणालला सुरुवातीच्या काळात बॉडी शेमिंगचाही सामना करावा लागला. तिच्या शरीरयष्टीवरून काही जण तिला टोमणे मारायचे. त्यामुळे तिचा आत्मविश्वास कमी झाला होता. मात्र, परदेशात गेल्यानंतर तिच्या शरीरयष्टीचं कौतुक झालं आणि तिने स्वतःचा स्वीकार केला. त्यानंतर तिचा आत्मविश्वास आणखी वाढला.

टीव्हीमध्ये यश मिळाल्यानंतर मृणालने मराठी चित्रपट ‘हॅलो नंदन’मधून मोठ्या पडद्यावर पाऊल ठेवलं. त्यानंतर २०१८ मध्ये ‘लव्ह सोनिया’ या चित्रपटातून तिने हिंदी चित्रपटसृष्टीत पदार्पण केलं. या भूमिकेसाठी तिने खूप मेहनत घेतली होती. चित्रपटातील व्यक्तिरेखा समजून घेण्यासाठी ती रेड लाईट परिसरातही गेली होती. या चित्रपटासाठी तिला लंडन इंडियन फिल्म फेस्टिव्हलमध्ये ‘बेस्ट न्यूकमर’ पुरस्कार मिळाला.  (Mrunal Thakur)

यानंतर ‘सुपर ३०’मध्ये तिला ऋतिक रोशनसोबत काम करण्याची संधी मिळाली. त्यानंतर ‘बाटला हाऊस’, ‘तूफान’ आणि ‘जर्सी’ या चित्रपटांमध्येही तिच्या अभिनयाचं कौतुक झालं. मात्र, २०२२ मध्ये प्रदर्शित झालेल्या ‘सीता रामम’ या चित्रपटाने तिच्या करिअरला मोठं वळण दिलं. या चित्रपटामुळे ती दक्षिण भारतीय चित्रपटसृष्टीतही लोकप्रिय झाली.

मृणालच्या आयुष्यात एक मोठा नकारही आला होता. सलमान खानच्या ‘सुलतान’ चित्रपटासाठी तिची निवड होण्याची शक्यता होती. दिग्दर्शक अली अब्बास जफर यांनी तिला सलमान खानच्या पनवेल येथील फार्महाऊसवर नेलं होतं. मात्र, त्या वेळी ती कुस्तीपटूच्या भूमिकेसाठी खूपच सडपातळ वाटत असल्याने सलमानने तिची निवड केली नाही. पुढे ही भूमिका अनुष्का शर्माने साकारली.  (Mrunal Thakur)

नंतर या घटनेवर बोलताना मृणालने सांगितलं की, प्रत्येक नकाराने तिला अधिक मजबूत बनवलं. आज ती सातत्याने चित्रपटांमध्ये काम करत आहे आणि तिला तात्पुरती प्रसिद्धी नव्हे, तर दीर्घकाळ टिकणारी कारकीर्द महत्त्वाची वाटते.

२०२६ मध्ये तिचे ‘डकैत: अ लव्ह स्टोरी’, ‘दो दीवाने शहर में’ आणि ‘है जवानी तो इश्क होना है’ हे चित्रपट प्रदर्शित झाले. सध्या ती अल्लू अर्जुनसोबतच्या ‘राका’ आणि ‘पूजा मेरी जान’ या आगामी चित्रपटांच्या शूटिंगमध्ये व्यस्त आहे.

सामान्य कुटुंबातून आलेली, अनेक नकार आणि अडचणींवर मात करणारी मृणाल ठाकूर आज लाखो तरुणांसाठी प्रेरणादायी उदाहरण बनली आहे. तिचा प्रवास सांगतो की, जिद्द, मेहनत आणि स्वतःवरचा विश्वास असेल तर यश नक्की मिळतं.