मुंबई : राज्यातील जिल्हा परिषदा, पंचायत समित्या तसेच नगरपरिषदा आणि नगरपंचायतींच्या निवडणुकांसाठी प्रारूप मतदार यादी आज प्रसिद्ध करण्यात आली आहे. या यादीतील नावे शोधण्यासाठी नागरिकांना https://mahasecvoterlist.in/ या संकेतस्थळावर सुविधा उपलब्ध करून देण्यात आली आहे.

राज्य निवडणूक आयोगाने १ जुलै २०२५ हा अधिसूचित दिनांक निश्चित केला असून, त्या दिवशी अस्तित्वात असलेली विधानसभेची मतदार यादी या निवडणुकांसाठी आधार म्हणून वापरली जात आहे. या आधारे जिल्हा परिषदेच्या निवडणूक विभागनिहाय, पंचायत समितीच्या निर्वाचक गणनिहाय तसेच नगरपरिषद आणि नगरपंचायतींच्या प्रभागनिहाय प्रारूप मतदार यादी तयार करण्यात आली आहे.

या यादीतील नावे शोधण्यासाठी https://mahasec.maharashtra.gov.in/ या राज्य निवडणूक आयोगाच्या अधिकृत संकेतस्थळावरही संबंधित लिंक उपलब्ध आहे. जिल्हा परिषद आणि पंचायत समितीच्या प्रारूप मतदार यादीची छायांकित प्रत संबंधित तहसील कार्यालयात उपलब्ध असेल, तर नगरपरिषद आणि नगरपंचायतीच्या यादीची छायांकित प्रत संबंधित नगरपरिषद व नगरपंचायत कार्यालयात मिळेल.

या मतदार यादीच्या प्रतींसाठी प्रतिपृष्ठ दोन रुपये शुल्क आकारले जाईल. याशिवाय, प्रारूप आणि अंतिम मतदार यादीची विनाछायाचित्र पीडीएफ स्वरूपातील प्रत https://mahasecvoterlist.in/ObjectionOnClick/DownloadVoterlist या संकेतस्थळावर उपलब्ध आहे. नागरिकांना आपली नावे तपासण्यासाठी आणि आवश्यक त्या सुधारणांसाठी ही सुविधा उपयुक्त ठरणार आहे.

संपर्क: अधिक माहितीसाठी नागरिकांनी जवळच्या तहसील कार्यालय, नगरपरिषद किंवा नगरपंचायत कार्यालयाशी संपर्क साधावा, असे आवाहन राज्य निवडणूक आयोगाने केले आहे.