IAS Transfer: राज्य सरकारने गुरुवारी नागपूर महानगरपालिकेला नवे आयुक्त दिले. नागपूरचे जिल्हाधिकारी डॉ. विपीन इटनकर यांची नागपूर मनपा आयुक्तपदी अधिकृत नियुक्ती करण्यात आली आहे. विद्यमान आयुक्त डॉ. अभिजित चौधरी यांची पुणे महानगर प्रदेश विकास प्राधिकरणावर (PMRDA) महानगर आयुक्त म्हणून बदली झाल्यानंतर हे पद रिक्त झाले होते. दरम्यान, काल दोन आयएएस अधिकाऱ्यांची बदली झाली होती. आदेशात काय म्हटले? शासन आदेशानुसार डॉ. इटनकर यांनी नव्या पदाचा कार्यभार त्वरित स्वीकारावयाचा आहे. विशेष म्हणजे पुढील आदेश होईपर्यंत नागपूर जिल्हाधिकारीपदाचा अतिरिक्त कार्यभारही ते सांभाळणार आहेत. त्यामुळे एकाच वेळी महापालिका आयुक्त आणि जिल्हाधिकारी अशी दुहेरी जबाबदारी त्यांच्यावर राहणार आहे. निवडणुकांनंतर बदलाचे वारे – राज्यात महापालिका निवडणुका नुकत्याच पार पडल्या असून महापौरही विराजमान झाले आहेत. कोविड काळापासून सुरू असलेली प्रशासकीय सत्ता आता संपुष्टात आली असल्याने आयुक्तपदांच्या बदल्यांना वेग आला आहे. नागपूरमध्ये सध्या अनेक पायाभूत सुविधा आणि नागरी विकास प्रकल्प सुरू असल्याने नव्या आयुक्तांसमोर मोठी जबाबदारी असेल. हेही वाचा – महाराष्ट्रातून 7 जणांची राज्यसभेवर बिनविरोध निवड; आमदार रोहित पवारांनी केले अभिनंदन डॉ. विपीन इटनकर कोण आहेत? डॉ. विपीन इटनकर हे आयएएस सेवेतील अनुभवी अधिकारी आहेत. प्रशासनात येण्यापूर्वी त्यांनी एमबीबीएस पूर्ण केले असून ते व्यवसायाने डॉक्टरही आहेत. २०१४ च्या बॅचमधून यूपीएससी परीक्षा उत्तीर्ण होऊन ते भारतीय प्रशासन सेवेत दाखल झाले. महाराष्ट्रातील विविध जिल्ह्यांमध्ये महत्त्वाच्या पदांवर काम केल्यानंतर ते नागपूरचे जिल्हाधिकारी होते. यापूर्वी त्यांनी चंद्रपूरचे जिल्हाधिकारी म्हणूनही काम पाहिले आहे.
