प्रभात वृत्तसेवा सातारा – फलटण येथील डॉक्टर युवतीच्या मृत्यूप्रकरणी गृहमंत्रालयाने विशेष चौकशी समिती नेमली आहे . राज्याच्या पोलिस महासंचालक रश्मी शुक्ला यांच्या आदेशानुसार एसआयटीच्या प्रमुखपदी पोलीस अधीक्षक तेजस्वी सातपुते यांची निवड करण्यात आली आहे. आदेश प्राप्त होतात सातपुते यांनी साताऱ्यातून प्रत्यक्ष चौकशीला सुरुवात केली आहे.फलटण उपजिल्हा रुग्णालयात कार्यरत असलेल्या डॉक्टर तरुणीने फलटणमधील एका हॉटेलमध्ये खोलीत आत्महत्या केली. तिच्या हातावर सुसाईड नोट लिहिलेली होती. त्यावर निलंबित पीएसआय गोपाळ बदने आणि प्रशांत बनकर यांची नावे लिहिलेली होती. बदने याने चार वेळा बलात्कार केल्याचे तिने नोटमध्ये दिले होते, तर प्रशांत बनकरनेही शारीरिक व मानसिक शोषण केल्याचा सुसाईड नोटमध्ये उल्लेख होता. माजी खासदार रणजितसिंह नाईक निंबाळकर यांच्या दोन स्वीय सहायकांनी बनावट पोस्टमार्टम रिपोर्ट देण्यासाठी दबाव टाकला गेल्याची ही तक्रार या तरुणीने केली होती. कायदा व सुव्यवस्था विभागाचे विशेष पोलिस महानिरीक्षक डॉ. मनोज कुमार शर्मा यांनी याबाबतचे आदेश दिले आहेत. आदेशात म्हटले आहे, सातारा जिल्ह्यात डॉ. संपदा मुंडे यांनी आत्महत्या केल्याप्रकरणी फलटण शहर पोलिस ठाण्यात गुन्हा दाखल करण्यात आला आहे. या गुन्ह्यात पोलीस खात्यातील एक पोलिस उपनिरीक्षक आरोपी असून, प्रकरण अतिशय संवेदनशील बनले आहे. त्यामुळे या प्रकरणाच्या तपासावर योग्य पद्धतीने देखरेख होण्याची गरज असल्यामुळे तेजस्वी सातपुते यांची तपासावर देखरेख करण्यासाठी नियुक्ती करण्यात आली आहे. सातपुते यांनी तत्काळ सातारा येथे जावून सातारा पोलिस अधिकारी आणि तपास अधिकाऱ्यांकडून सविस्तर माहिती घ्यावी. गुन्ह्याचा तपास योग्य पद्धतीने व कालमर्यादेत होईल हे पहावे. तसेच तपासाचा प्रगती अहवाल वेळोवेळी कार्यालयास सादर करावा. या प्रकरणातील आरोप प्रत्यारोप वाढते राहिल्यामुळे गृहमंत्री तथा राज्याचे मुख्यमंत्री देवेंद्र फडणवीस यांनी विशेष चौकशी समिती स्थापन करण्याचे पोलीस महासंचालकांना आदेश दिले. राज्याच्या डीजी रश्मी शुक्ला यांनी तातडीने हा तपास राज्य राखीव पोलीस दल गट नंबर एकच्या पोलीस अधीक्षक तेजस्वी सातपुते यांना तात्काळ चौकशीचे आदेश दिले. सातपुते यांनी साताऱ्यात येऊन फलटण मधील पोलीस व आरोग्य यंत्रणांशी संपर्क साधत आवश्यक ती माहिती गोळा करण्यास प्रारंभ केला आहे. या तपासाचा अंतिम अहवाल लवकरात लवकर हा पोलीस महासंचालकांना सादर केला जाणार असल्याची माहिती आहे.
