पुणे: दि पूना गुजराती केळवणी मंडळाच्या नुकत्याच पार पडलेल्या कार्यकारिणी सभेत सन २०२५-२०२८ या तीन वर्षांच्या कालावधीसाठी संस्थेच्या कार्याध्यक्षपदी डॉ.राजेश शहा ,उपाध्यक्षपदी जनक शहा, सचिवपदी हेमंत मणियार व खजिनदारपदी महेश धरोड यांची एकमताने निवड करण्यात आली. त्याचप्रमाणे या बैठकीत संस्थेचे इतर पदाधिकारी म्हणून सह-सचिवपदी दिलीप जगड, संदीप शहा व विनोद देडिया, तर सह-खजिनदारपदी प्रमोद शहा यांची निवड करण्यात आली.

शिक्षण हे केवळ ज्ञानदानच नव्हे, तर सामाजिक परिवर्तनाचेही मुख्य साधन ठरेल, हा दृष्टीकोन ठेवून कार्य करणारी ही संस्था यंदाच्या वर्षात आपले गौरवशाली शताब्दी वर्ष साजरे करीत आहे. पारंपरिक मूल्ये आणि अत्याधुनिक शिक्षण यांचा समन्वय साधणारी संस्था म्हणून मंडळ आपल्या गुणवत्तेमुळे नावलौकिकास आले आहे. मंडळाने आपल्या आजवरच्या प्रवासात आर. सी. एम. गुजराती प्रशाला आवार, कसबा पेठ, हरिभाई व्ही. देसाई महाविद्यालय आवार, बुधवार पेठ आणि PGKM स्कूल देसाई विद्याधाम आवार, कोंढवा अशा तीन ठिकाणी विविध शैक्षणिक केंद्रे उभारली आहेत.

संस्थेने आपल्या या शैक्षणिक प्रवासात नुकतीच एक मोलाची भर घातली आहे. प्रगत तंत्रज्ञानाच्या युगात विद्यार्थ्यांना उज्ज्वल भवितव्याच्या संधी उपलब्ध व्हाव्यात व ते बदलत्या डिजिटल जगात स्पर्धाशील बनावेत, यासाठी मंडळाच्या हरिभाई व्ही. देसाई महाविद्यालयाने शैक्षणिक वर्ष २०२५-२६ पासून बी.एस्सी. सायबर सुरक्षा (B.Sc. Cyber Security) हा नवा अभ्यासक्रम सुरू केला आहे. मंडळामार्फत चालविल्या जाणाऱ्या सर्व संस्थांमध्ये मिळून सुमारे दहा हजार विद्यार्थी शिक्षण घेत आहेत. संस्थेचे सर्व पदाधिकारी संस्थेचे माजी विद्यार्थी असून शैक्षणिक क्षेत्रात महत्त्वपूर्ण योगदान देत आहेत.