कोल्हापूर : तब्बल 30 हजार फूट उंचीवर असलेल्या विमानात कोणतेही रुग्णालय किंवा कोणतेही उपकरण नसताना मृत्यूच्या दारात उभी असलेल्या परदेशी महिला प्रवाशाचा डॉ. अंजली निंबाळकर यांनी जीव वाचवला आहे. गोवा येथून दिल्लीकडे जाणाऱ्या इंडिगो एअरलाइन्सच्या विमानात उड्डाणादरम्यान हा गंभीर वैद्यकीय आपत्कालीन प्रसंग घडला. गोव्याहून दिल्लीकडे जाणाऱ्या इंडिगो एअरलाइन्सच्या विमानात उड्डाणानंतर काही क्षणांत अचानक एक 34 वर्षांची अमेरिकन महिला प्रवासी बसल्या जागेवरून खाली कोसळली. तिचे शरीर थंड पडले होते, हाताची नाडी जवळपास थांबली होती. श्वास घेण्याची क्षमता क्षीण होत चालली होती. विमानात गोंधळाची परिस्थिती निर्माण झाली. काय करावे, हे सूचायच्या आत डॉ. अंजली निंबाळकर जागेवरुन उठल्या. कुठलीही वैद्यकीय साधने नसताना त्यांनी प्रसंगावधान राखत सीटवरच सीपीआर सुरू केला. त्या महिलेच्या बहिणीकडून तिची हेल्थ हिस्ट्री जाणून घेतली आणि त्यानुसार प्राथमिक उपचार सुरू केले. काही मिनिटांत त्या परदेशी महिलेला शुद्ध आली आणि तीचा जीव वाचला. शुद्धीवर येताच तिला तात्काळ इलेक्ट्रोलाइट्सचे पाणी देण्यात आले. डॉ. निंबाळकर या बेळगाव जिल्ह्यातील खानापूरच्या माजी आमदार आणि काँग्रेस वर्किंग कमिटीच्या सदस्या आहेत. तसेच कोल्हापूरचे सुपूत्र आणि कर्नाटकचे आयपीएस अधिकारी हेमंत निंबाळकर यांच्या त्या पत्नी आहेत.
