Double Voting – हवेलीत तब्बल 3064 दुबार मतदार आहेत. स्थानिक स्वराज्य संस्थाच्या सार्वत्रिक निवडणुकीमध्ये दोन वेळा मतदान करणे हा फौजदारी स्वरुपाचा गुन्हा आहे. त्यांच्यावर लोकप्रतिनिधित्व अधिनियम, १९५० मधील कलम १७ व १८ व लोकप्रतिनिधित्व अधिनियम, १९५१ मधील कलम ६२ (३) व (४) नुसार गुन्हा दाखल होऊ शकतो. याची दुबार मतदारांनी नोंद घ्यावी असे आवाहन जिल्हा परिषद व पंचायत समिती हवेलीचे निवडणूक निर्णय अधिकारी डॉ.यशवंत माने यांनी केले आहे. हवेली तालुक्यात जिल्हा परिषद गट व पंचायत समिती गणांमध्ये एकूण 3064 दुबार मतदार आहेत.त्यामध्ये स्त्री मतदार 1330 व पुरुष मतदार 1734 एवढे आहे. त्यामुळे महानगरपालिकेच्या निवडणुकीत मतदान केलेल्यांनी जिल्हा परिषद व पंचायत समिती निवडणुकीत मतदान करण्याची शक्यता असल्याच्या तक्रारी प्राप्त झाल्या आहेत. त्यामुळे दुबार मतदारांचा मुद्दा पुन्हा ऐरणीवर आला आहे. जिल्हा परिषद पुणे त्यामुळे हवेलीतील एकूण 263 मतदान केंद्रावरील मतदारांना आवाहन करण्यात आले आहे की, राज्य निवडणूक आयोग, महाराष्ट्र यांचेकडील पत्रानुसार एकापेक्षा जास्त वेळेस (दुबार, तिबार…) मतदार यादीमध्ये नांव असलेल्या मतदारांनी मतदान केंद्रस्तरीय अधिकारी (BLO) यांचेकडे परिशिष्ट-१ मध्ये आपणांस कोणत्या मतदान केंद्रावर मतदान करण्याची इच्छा आहे याबाबत लेखी स्वरुपात कळवायाचे आहे.असे निवडणूक निर्णय अधिकारी यशवंत माने यांनी सांगितले. नुकत्याच १५ जानेवारी २०२६ रोजी पार पाडलेल्या पुणे महानगरपालिका सार्वत्रिक निवडणुकीवेळी मतदान केलेल्या काही मतदारांची नावे पुणे जिल्हा परिषद व पंचायत समिती हवेलीच्या मतदार यादीतही आहेत. असे मतदार दि. ७ फेब्रुवारी २०२६ रोजी होणाऱ्या जिल्हा परिषद व पंचायत समिती सार्वत्रिक निवडणूकीच्या वेळीही दुसऱ्यांदा मतदान करण्याची शक्यता असल्याने निवडणूक आयोग दुबार मतदारांना काय प्रतिबंध करणार याकडे नागरिकांचे लक्ष लागले आहे.
