नवी दिल्ली : जून २०२५ मध्ये महागाईबाबत देशवासीयांसाठी दुहेरी दिलासा देणारी बातमी समोर आली आहे. एकीकडे घाऊक बाजारात वस्तूंच्या किमती कमी झाल्या असून, दुसरीकडे किरकोळ किमतींची वाढ सहा वर्षांच्या नीचांकी पातळीवर आली आहे. सोमवारी जाहीर झालेल्या सरकारी आकडेवारीतून ही माहिती समोर आली आहे.

सहा वर्षांतील सर्वात कमी किरकोळ महागाई –
भाजीपाला, डाळी, मांस, दूध आणि संबंधित उत्पादनांच्या किमतींमध्ये नरमाई आल्याने जून २०२५ मध्ये उपभोक्ता मूल्य निर्देशांक (CPI) आधारित किरकोळ महागाईचा दर २.१ टक्क्यांवर घसरला आहे, जो गेल्या सहा वर्षांतील सर्वात कमी आहे. राष्ट्रीय सांख्यिकी कार्यालयाने (NSO) दिलेल्या माहितीनुसार, मागील वर्षी जून २०२४ मध्ये हा दर ५.०८ टक्के, तर मे २०२५ मध्ये २.८२ टक्के होता. एनएसओने आपल्या निवेदनात म्हटले आहे की, मे २०२५ च्या तुलनेत जून २०२५ मध्ये एकूण महागाईत ०.७२ टक्के घट झाली आहे. ही जानेवारी २०१९ नंतरची वार्षिक आधारावर सर्वात कमी पातळी आहे. जानेवारी २०१९ मध्ये हा दर १.९७ टक्के नोंदवला गेला होता.

जून २०२५ मधील एकूण आणि खाद्य महागाईतील उल्लेखनीय घट यामागील प्रमुख कारण अनुकूल आधार प्रभाव आणि भाजीपाला, डाळी, मांस-मासे, तृणधान्ये, साखर आणि मिठाई, दूध आणि दुग्धजन्य पदार्थ तसेच मसाल्यांच्या किमतींमध्ये झालेली घट आहे, असे एनएसओने स्पष्ट केले आहे.

घाऊक महागाईत मोठा दिलासा –
दुसरीकडे, घाऊक बाजारात वस्तू महाग होण्याऐवजी स्वस्त झाल्या आहेत. वाणिज्य आणि उद्योग मंत्रालयाने दिलेल्या माहितीनुसार, खाद्यपदार्थ, इंधन आणि वीज यांच्या किमतींमध्ये घट तसेच निर्मित उत्पादनांच्या खर्चात कपात यामुळे घाऊक मूल्य निर्देशांक (WPI) आधारित महागाई १९ महिन्यांनंतर प्रथमच शून्याच्या खाली म्हणजेच -०.१३ टक्क्यांवर आली आहे. मे २०२५ मध्ये हा दर ०.३९ टक्के, तर जून २०२४ मध्ये ३.४३ टक्के होता. विशेष म्हणजे, खाद्यपदार्थांच्या किमतींमध्ये ३.७५ टक्के घट झाली असून, भाज्यांच्या किमतींमध्ये २२.६५ टक्के, तर आलू आणि कांद्याच्या किमतींमध्ये अनुक्रमे ३२.६७ टक्के आणि ३३.४९ टक्के घट नोंदवली गेली आहे. इंधन आणि वीज क्षेत्रातील महागाईचा दरही -२.६५ टक्क्यांवर आला आहे.

अर्थव्यवस्थेसाठी सकारात्मक संकेत –
या दोन्ही महागाई निर्देशांकांमधील लक्षणीय घट सामान्य नागरिक आणि उद्योग क्षेत्रासाठी दिलासादायक आहे. भारतीय रिझर्व्ह बँकेने (RBI) गेल्या महिन्यात रेपो दरात ०.५० टक्के कपात करून तो ५.५० टक्क्यांवर आणला आहे. कमी महागाईचा हा कल कायम राहिल्यास, येत्या काळात बँक कर्ज स्वस्त होऊन आर्थिक विकासाला चालना मिळण्याची शक्यता आहे.

ही आकडेवारी सामान्य नागरिकांच्या खिशावर सकारात्मक परिणाम करणारी असून, विशेषतः स्वयंपाकघरातील वस्तू स्वस्त झाल्याने दैनंदिन बजेटला मोठा दिलासा मिळाला आहे.