Dongri Mahotsav Patan – सह्याद्रीच्या नयनरम्य कुशीत वसलेला पाटण तालुका आता पर्यटनाच्या नव्या पर्वासाठी सज्ज झाला असून, पाच दिवस चालणारा भव्य डोंगरी महोत्सव यंदा मोठ्या दिमाखात रंगणार आहे. हिरव्यागार डोंगररांगा, धुक्याची चादर आणि निसर्गाची मुक्त उधळण यामुळे पाटण तालुका पर्यटकांसाठी आकर्षणाचे केंद्र ठरणार आहे. राज्याचे पर्यटन मंत्री तथा सातारा जिल्ह्याचे पालकमंत्री शंभूराज देसाई यांच्या पुढाकारातून आयोजित करण्यात येणारा हा महोत्सव केवळ उत्सव न राहता, पर्यटन विकासाचा महत्त्वपूर्ण टप्पा ठरत आहे. ग्रामीण भागातील निसर्गसंपदा, संस्कृती आणि परंपरा यांना व्यासपीठ उपलब्ध करून देत, पाटणला पर्यटनाच्या नकाशावर ठळक स्थान मिळवून देण्याचा या उपक्रमामागील उद्देश आहे. या डोंगरी महोत्सवात साहस आणि संस्कृतीचा अनोखा संगम पाहायला मिळणार आहे. ट्रेकिंग, रॉक क्लायंबिंग, सायकलिंग यांसारखे साहसी उपक्रम पर्यटकांना थरारक अनुभव देणार आहेत, तर ढोल-ताशा, लेझीम, लोकनृत्य, पारंपरिक गाणी आणि सांस्कृतिक कार्यक्रम यामुळे वातावरण भारावून जाणार आहे. यासोबतच, स्थानिक खाद्यसंस्कृतीचे खास स्टॉल्स, महिला बचत गटांचे उपक्रम, हस्तकलेचे प्रदर्शन आणि ग्रामीण जीवनशैलीचे दर्शन या महोत्सवाला अधिक समृद्ध करणार आहे. त्यामुळे हा महोत्सव केवळ मनोरंजनापुरता मर्यादित न राहता, स्थानिक अर्थव्यवस्थेला चालना देणारा ठरणार आहे.
