फ्लोरिडा, (अमेरिका) : रशिया आणि युक्रेन यांच्यातील युद्ध थांबवण्यासाठी युक्रेनचा डोनबास हा प्रांत तोडला जावा आणि त्याचा बहुतांश भाग रशियाच्या ताब्यातच राहू देण्यात यावा, असा प्रस्ताव अमेरिकेचे अध्यक्ष डोनाल्ड ट्रम्प यांनी सुचवला आहे. हा प्रांत आता तोडला जावा. ज्याच्या ताब्यात जेवढा भाग आहे, तो त्याचा असेल. उरलेला भाग सोडून देण्यात यावा. अन्य विषयांबाबत ज्या काही वाटाघाटी करायच्या आहेत, त्या नंतर केल्या जाऊ शकतील, असे विमानात पत्रकारांशी बोलताना ट्रम्प म्हणाले. आता संघर्ष थांबवण्यासाठी तात्काळ काही उपाययोजना केली जायला हवी. तरच रक्तपात थांबवला जाऊ शकेल, असेही ते म्हणाले. युक्रेनने रशियाच्या दक्षिणेकडील ओरेन्बर्ग येथील मोठ्या गॅस प्रक्रिया प्रकल्पावर ड्रोन हल्ला केल्यानंतर या प्रकल्पाला मोठी आग लागली. त्यामुळे कझाकस्तानमधून गॅस प्राप्त करणे थांबवावे लागल्याचे कझाक आणि रशियाच्या अधिकाऱ्यांनी काल सांगितले. त्यानंतर ट्रम्प यांनी हा प्रस्ताव सुचवला आहे. युक्रेनने गमावलेली भूमी परत मिळवण्याचा प्रयत्न करणे सोडून द्यायला हवे. तरच रशियाचे आक्रमण थांबवले जाऊ शकेल, असेही ट्रम्प यांनी काल सुचवले होते. काही तरी मिळाल्याशिवाय पुतीन हे युद्ध थांबवणार नाहीत, असेही त्यांनी म्हटले आहे. ट्रम्प यांच्याबरोबरची चर्चा सकारात्मक गेल्या आठवड्यात ट्रम्प यांच्याबरोबर झालेली चर्चा सकारात्मक होती, असे युक्रेनचे अध्यक्ष झेलेन्स्की यांनी म्हटले आहे. या चर्चेच्यावेळी ट्रम्प यांनी युक्रेनला टॉमहॉक क्षेपणास्त्रे देण्याची कोणतीही ठोस ग्वाही दिली नव्हती. युक्रेनला ही घातक क्षेपणास्त्रे देताना अमेरिकेला आपल्या भावी काळासाठी या क्षेपणास्त्रांचा साठा पुरेसा ठेवणे गरजेचे वाटते आहे, युक्रेनबरोबर शस्त्रास्त्र विक्रीचा व्यवहार करताना अमेरिकेला आपल्या हिताचाही विचार करावा लागेल, असे ट्रम्प म्हणाले होते. हे युद्ध अधिक चिघळू नये, यासाठीच त्यांनी टॉमहॉक क्षेपणास्त्रे न देण्याचा निर्णय घेतला असावा, असेही झेलेन्स्की म्हणाले होते.
