Donald Trump | Mark Zuckerberg – अमेरिकेचे माजी अध्यक्ष आणि रिपब्लिकन पक्षाचे उमेदवार डोनाल्ड ट्रम्प यांनी मोठा दावा केला आहे. फेसबुकचे संस्थापक आणि मुख्य कार्यकारी अधिकारी मार्क झुकरबर्ग यांनी अलिकडेच आपली माफी मागितली आहे असे ट्रम्प यांनी म्हटले आहे. ते फॉक्स न्यूजला दिलेल्या मुलाखतीत बोलत होते. ट्रम्प म्हणाले की झुकरबर्गने मला फोन केला. आपण कोणत्या डेमोक्रॅटचे समर्थन करणार नाही असे त्यांनी मला सांगितले. ते यावरच काम करत आहेत आणि मला वाटते त्यांनी ते सगळे ठिक केले आहे. त्यांनी (झुकरबर्ग) पाच वर्षांपूर्वी ५० कोटी अमेरिकी डॉलर घेऊन जे केले होते तसे आता करणार नाहीत. ते आता पुन्हा असे करणार नाहीत याचा मला विश्वास आहे. दरम्यान, ट्रम्प यांनी सर्च इंजिन गुगललाही धमकावले आहे. गुगल त्यांचे फोटो आणि बातम्या सेन्सॉर करतो आहे. हा प्रकार अत्यंत बेजबाबदारपणाचा आहे. गुगल अत्यंत वाईट आहे आणि ते अगदी बेजबाबदार आहेत. मला वाटते गुगल शटडाऊन करण्याच्या तयारीत आहे. कारण कॉंग्रेस हे सहन करणार नाही आणि त्यामुळे गुगलला सावध राहावे लागेल असा इशारा त्यांनी दिला.
