International News : गेल्या दोन वर्षांपासून गाझामध्ये हमास आणि इस्रायल यांच्यात सुरू असलेले युद्ध आता अनेक देशांपर्यंत पसरले आहे. लेबनान, इराण यांसारख्या देशांशी इस्रायल थेट युद्धात उतरला आहे. पण मंगळवारी इस्रायलने सर्वांना धक्का देत कतारची राजधानी दोहा येथे हल्ले केले आणि हमासच्या दहशतवाद्यांना लक्ष्य केल्याचा दावा केला. विशेष म्हणजे, कतार हा तोच देश आहे जिथे हमाससोबत शांतता चर्चेच्या बैठका होत होत्या. अशा शांतता मंचाच्या देशात घुसून हल्ले केल्याने संपूर्ण मध्यपूर्वेतील परिस्थिती बिघडण्याची भीती व्यक्त केली जात आहे. याच पार्श्वभूमीवर, कतारने रविवार आणि सोमवारी इस्लामिक आणि अरब देशांची परिषद बोलावली आहे. या परिषदेत इस्रायलच्या हल्ल्यांमुळे निर्माण झालेल्या परिस्थितीवर चर्चा होणार आहे. दरम्यान, अमेरिकेचे राष्ट्राध्यक्ष डोनाल्ड ट्रम्प यांनी इस्रायलच्या या कृतीवर तीव्र नाराजी व्यक्त केली आहे. ‘अॅक्सिओस’ या वृत्तसंस्थेने सूत्रांच्या हवाल्याने प्रसिद्ध केलेल्या अहवालात म्हटले आहे की, ट्रम्प यांनी इस्रायलचे पंतप्रधान बेंजामिन नेतन्याहू यांच्याशी फोनवरून संवाद साधताना स्पष्ट शब्दांत सांगितले की, अशी कृती पुन्हा होता कामा नये. ट्रम्प म्हणाले, “हे पूर्णपणे अस्वीकार्य आहे. मी सांगतोय, तुम्ही पुन्हा अशी कृती करू नये.” अहवालानुसार, कतारच्या राजधानीतील हल्ल्याने ट्रम्प यांचे सल्लागारही थक्क झाले. यासंदर्भात झालेल्या चर्चेत ट्रम्प यांनी नेतन्याहू आणि त्यांच्या सल्लागारांच्या कृतीवर आश्चर्य व्यक्त करताना विचारले की, “तुम्ही असे कसे करू शकता?” मात्र, येथेच विषय संपलेला नाही. ट्रम्प यांच्या आक्षेपांनंतर आणि मुस्लिम देशांच्या संतापानंतरही नेतन्याहू आपल्या भूमिकेवर ठाम आहेत. त्यांनी पुन्हा एकदा जाहीर केले आहे की, कतारसह दहशतवाद्यांना आश्रय देणाऱ्या देशांवर आम्ही हल्ले सुरूच ठेवू. कतारला थेट आणि खुलेआम आव्हान देताना नेतन्याहू म्हणाले, “एकतर दहशतवाद्यांना देशाबाहेर काढा, नाहीतर हल्ल्यांसाठी तयार राहा.” दरम्यान, लेबनानमध्ये इस्रायली सैन्याने पुन्हा एकदा हल्ले केले आहेत. सैन्याने हिजबुल्लाच्या ठिकाणांना उद्ध्वस्त केल्याचा दावा केला आहे. हे हल्ले लेबनानच्या बेका खोऱ्यात झाले असून, त्याचे व्हिडिओ सोशल मीडियावर व्हायरल होत आहेत. सीरियानेही हिजबुल्लाच्या ठिकाणांवर केले हल्ले, इस्रायलला यश – इस्रायली सैन्याने सांगितले की, बेका खोऱ्यात हिजबुल्लाच्या त्या ठिकाणांवर हल्ले केले गेले, जिथे त्यांनी शस्त्रांचा साठा ठेवला होता. यापूर्वीही इस्रायलने या भागात हल्ले केले आहेत. दरम्यान, इस्रायलला एक मोठे यश मिळाले आहे. सीरियाने स्वतःच आपल्या देशातील हिजबुल्लाच्या ठिकाणांना लक्ष्य केले आहे. सीरियाचे सध्याचे राष्ट्राध्यक्ष अहमद अल शारा हे हिजबुल्लाविरोधी मानले जातात, तर यापूर्वीचे राष्ट्राध्यक्ष बशर अल असद हे हिजबुल्लाचे समर्थक होते.
