Bhindi Storage: भेंडीची भाजी अनेकांच्या आवडीची असते. भेंडी मसाला, भरलेली भेंडी, कुरकुरीत भेंडी किंवा साधी भाजी अशा अनेक प्रकारे भेंडी खाल्ली जाते. मात्र, भेंडी विकत आणल्यानंतर ती जास्त दिवस ताजी ठेवणे अनेकांसाठी कठीण होते. योग्य पद्धतीने साठवणूक केली नाही, तर भेंडी लवकर सुकते, काळी पडते किंवा चिकट होऊन खराब होऊ लागते. विशेष म्हणजे फ्रिजमध्ये ठेवल्यानंतरही अनेकदा भेंडीची ताजी चव आणि गुणवत्ता टिकत नाही.

अशावेळी भेंडी साठवण्याची योग्य पद्धत माहिती असणे गरजेचे आहे. स्वयंपाकघरातील काही सोप्या टिप्स वापरून तुम्ही भेंडी अनेक दिवस ताजी ठेवू शकता. यासाठी कोणत्याही महागड्या वस्तूंची गरज नाही. फक्त भेंडी साठवताना काही छोट्या गोष्टी लक्षात ठेवाव्या लागतील.

१. भेंडी धुऊन लगेच फ्रिजमध्ये ठेवू नका

भेंडी लवकर खराब होण्यामागे त्यावरील ओलावा हे एक महत्त्वाचे कारण असू शकते. अनेक जण बाजारातून भेंडी आणल्यानंतर ती लगेच धुऊन फ्रिजमध्ये ठेवतात. मात्र, भेंडीवर पाणी राहिल्यास ती लवकर सडण्याची शक्यता असते. त्यामुळे भेंडी विकत आणल्यानंतर ती न धुता साठवून ठेवा. भाजी बनवण्यापूर्वीच आवश्यक तेवढी भेंडी धुवा. धुतल्यानंतर तिच्यावरील पाणी व्यवस्थित पुसून मगच चिरा.

२. पेपर टॉवेलचा करा वापर

भेंडी जास्त दिवस ताजी ठेवण्यासाठी पेपर टॉवेलचा वापर करणे हा एक सोपा उपाय आहे. यासाठी भेंडी स्वच्छ आणि कोरडी असल्याची खात्री करा. त्यानंतर ती पेपर टॉवेलमध्ये हलक्या हाताने गुंडाळून ठेवा. पेपर टॉवेल भेंडीवरील अतिरिक्त ओलावा शोषून घेण्यास मदत करतो. त्यामुळे भेंडी लवकर चिकट किंवा खराब होण्याची शक्यता कमी होते. पेपर टॉवेल ओला झाल्यास तो बदलायला विसरू नका.

३. एअरटाइट डब्याऐवजी हवेशीर जागी ठेवा

अनेकांना भाज्या एअरटाइट डब्यात ठेवण्याची सवय असते. मात्र, भेंडी साठवताना पूर्णपणे बंद डबा वापरणे टाळावे. अशा डब्यात ओलावा साचू शकतो आणि त्यामुळे भेंडी लवकर खराब होऊ शकते. त्याऐवजी भेंडी हलक्या उघड्या डब्यात किंवा स्वच्छ कापडी पिशवीत ठेवा. यामुळे भेंडीभोवती हवा खेळती राहण्यास मदत होते. तसेच अतिरिक्त ओलावा साचण्याची शक्यताही कमी होते.

४. फ्रिजमध्ये योग्य ठिकाणी ठेवा

भेंडी फ्रिजमध्ये ठेवताना ती कोणत्या भागात ठेवली आहे, याकडेही लक्ष द्यावे. फ्रिजच्या भाजीपाला साठवण्याच्या स्वतंत्र कप्प्यात भेंडी ठेवणे योग्य ठरते. फ्रिजमधील अतिथंड भागात भेंडी ठेवल्यास तिचा रंग आणि गुणवत्ता खराब होऊ शकते. त्यामुळे भेंडी थेट फ्रिजच्या थंड हवेच्या संपर्कात येणार नाही, याची काळजी घ्या. योग्य तापमानात ठेवल्यास भेंडीची ताजेपणा टिकवण्यास मदत होते.

५. खराब झालेली भेंडी लगेच वेगळी करा

भेंडी साठवून ठेवल्यानंतर वेळोवेळी ती तपासणेही महत्त्वाचे आहे. काही भेंडी मऊ पडली असेल, काळी झाली असेल किंवा त्यावर चिकटपणा जाणवत असेल, तर ती लगेच वेगळी काढा. एक भेंडी खराब झाल्यामुळे इतर भेंडीवरही त्याचा परिणाम होऊ शकतो. त्यामुळे साठवलेल्या भेंडीची अधूनमधून तपासणी करा. यामुळे चांगली भेंडी खराब होण्यापासून वाचवता येते.

भेंडी ताजी ठेवण्यासाठी लक्षात ठेवा ही एक गोष्ट!

भेंडी जास्त दिवस ताजी ठेवायची असेल, तर ती न धुता साठवा. त्यानंतर पेपर टॉवेलमध्ये गुंडाळून हवेशीर डब्यात किंवा कापडी पिशवीत ठेवा. फ्रिजच्या भाजीपाला ठेवण्याच्या कप्प्यात तिची साठवणूक करा. भेंडीवर ओलावा राहणार नाही, याची विशेष काळजी घ्या.

या छोट्या-छोट्या टिप्स वापरल्यास भेंडी लवकर खराब होण्यापासून वाचवता येईल. त्यामुळे वारंवार भाजी फेकून देण्याची वेळ येणार नाही आणि अन्नाची नासाडीही टाळता येईल.