पिंपरी : बांधकाम, घरेलू कामगारांना पाच हजार रुपये दिवाळी बोनस द्यावा, अशी मागणी कष्टकरी संघर्ष महासंघ महाराष्ट्र अध्यक्ष काशिनाथ नखाते, महाराष्ट्र राज्य बांधकाम कामगार संघटना स्वतंत्र कृती समितीचे अध्यक्ष सागर तायडे,प्रदेश उपाध्यक्ष राजेश माने, मनोज यादव, लाला राठोड यांनी केली आहे. या संदर्भात कामगार नेत्‍यांनी मुंबई येथे कामगार मंत्री आकाश फुंडकर यांच्यासोबत चर्चा केली.

महाराष्ट्र राज्यातील बांधकाम कामगारांसाठी विविध २८ योजना राबविण्यात येत आहेत तर काही योजना थांबल्या आहेत त्याही मिळाव्यात. आणि महाराष्ट्र घरेलु कामगार कल्याण महामंडळाचे कामकाज ठप्प झाले आहे त्यास निधी देऊन कार्यान्वित करावे आणि बांधकाम कामगार, घरेलु कामगार, रिक्षाचालक यांना प्रत्येकी ५ हजार रुपये दिवाळीसाठी सानुग्रह अनुदान देण्यात यावे अशी मागणी कामगार नेते काशिनाथ नखाते यांनी मंत्रालय मुंबई येथे कामगार मंत्री यांची भेट घेऊन निवेदन व चर्चेद्वारे केली.

करोना काळात बांधकाम कामगार, घरेलू कामगार, फेरीवाला आणि रिक्षा चालक यांना अनुदान दिले होते याचे स्मरण करून देत कष्टकऱ्यांच्या बोनस बाबत आपण सकारात्मक विचार करून त्वरित देण्यात यावे, अशी मागणी नखाते यांनी केली. कामगार मंत्री फुंडकर यांनी याबाबत आर्थिक परिस्थिती पाहून निर्णय घेऊ तसेच इतर मागण्या सोडवण्याबाबत सकारात्मक विचार करू असे आश्वासन दिले.

प्रमुख मागण्या

१. सर्व असंघटित कामगारांना राज्य कामगार विमा ईएसआयसी सुरू करा
२ घरेलु कामगारांना लाभ देण्यासाठी १००० कोटींची तरतूद करावी.
३. कामगारांचे कामाचे तास ८ वरून आता १२ तास केले आहेत ते रद्द करण्यात यावेत.
४. कामगार पडताळणी संख्या दररोज ४० ऐवजी २०० करावी.
५. कामगारांना आवश्यक गंभीर आजारासाठी १ लाख रुपये अर्थसहाय्य द्यावे.
६.घरेलु कामगारांना गृह उपयोगी साहित्य १ वर्षापासून बंद आहे ते वाटप करावे
७.आवास योजनेच्या अंतर्गत अनेक कामगारांच्या घरांसाठी २ लाख त्वरित अनुदान सुरू करावे .