Divya Shinde : ‘बिग बॉस मराठी’ची माजी स्पर्धक आणि सोशल मीडिया इन्फ्लुएन्सर दिव्या शिंदे हिच्यासह तिच्या साथीदारांविरुद्ध पुण्यात गुन्हा दाखल करण्यात आला आहे. निवृत्त शासकीय वैद्यकीय अधिकारी डॉ. विद्याधर गायकवाड यांना घरात घुसून मारहाण केल्याचा आणि ५ लाख रुपयांची मागणी केल्याचा आरोप आहे. ‘न्याती हाईलँड्स’ परिसरात गुरुवारी रात्री ही घटना घडल्याचे तक्रारीत नमूद आहे.

डॉ. गायकवाड हे २०२१ मध्ये पुणे कॅन्टोन्मेंट रुग्णालयातून वैद्यकीय अधिकारी म्हणून निवृत्त झाले आहेत. ते ‘करुणादीप फाउंडेशन’चे सदस्य आहेत. या संस्थेने सप्टेंबरमध्ये बालगंधर्व रंगमंदिरात ‘कला आविष्कार महोत्सव’ आयोजित केला होता. या कार्यक्रमाला प्रसिद्धी मिळवून दिल्याचा दावा करत दिव्या शिंदे यांनी ५ लाख रुपयांची मागणी केल्याचा आरोप आहे. डॉ. गायकवाड यांनी सुमारे ५० हजार रुपये गुगल पेने दिल्याचेही तक्रारीत म्हटले आहे.

एफआयआरनुसार, दिव्या शिंदे, अण्णा ढमढेरे आणि काही जणांनी डॉ. गायकवाड यांच्या घरी जाऊन पैसे मागितले. त्यानंतर गुरुवारी रात्री घरात घुसून काठी, बेल्ट आणि तांब्याने मारहाण केल्याचा आरोप आहे. घरातील वस्तूंची तोडफोड करून जीवे मारण्याची धमकी दिल्याचेही तक्रारीत म्हटले आहे. जखमी डॉ. गायकवाड यांच्यावर ससून रुग्णालयात उपचार सुरू आहेत.

दरम्यान, दिव्या शिंदेच्या वकिलांनी हे आरोप फेटाळून प्रकरण खोटे असल्याचा दावा केला आहे. पोलिसांनी सीसीटीव्ही फुटेज ताब्यात घेतले असून तपास सुरू आहे.