Disha Patani: बॉलिवूडची लोकप्रिय अभिनेत्री दिशा पटानी आपल्या बिनधास्त फॅशन सेन्स आणि स्टायलिश लूकमुळे नेहमीच चर्चेत असते. सोशल मीडियावर तिचा जबरदस्त फॅन फॉलोइंग आहे. नुकत्याच झालेल्या न्यूयॉर्क फॅशन वीक 2025 मध्ये तिने आपल्या ग्लॅमरस अंदाजाने सर्वांचे लक्ष वेधून घेतले.
दिशा केल्विन क्लेन शोमध्ये रॅम्पवर उतरली होती. काळ्या रंगाच्या पारदर्शक ड्रेससोबत हाय-वेस्ट ट्राउझर्स, सॉफ्ट मेकअप आणि मिनिमल अॅक्सेसरीज घालून ती रॅम्पवर झळकली. तिचा आत्मविश्वास आणि बोल्ड लूक पाहून उपस्थित प्रेक्षकांनीच नव्हे तर सोशल मीडियावरही कौतुकाचा वर्षाव केला. इंस्टाग्रामवर शेअर केलेल्या तिच्या फोटोंवर चाहत्यांनी “गॉर्जियस”, “हॉट” अशा प्रतिक्रिया देत तिच्या सौंदर्याची प्रशंसा केली.
मात्र, ज्या काळात दिशा आंतरराष्ट्रीय स्तरावर चर्चेत आहे, त्याच वेळी तिच्या कुटुंबाला हादरवून टाकणारी घटना घडली. १२ सप्टेंबर रोजी बरेली येथील तिच्या घराबाहेर अज्ञात व्यक्तींनी गोळीबार केला. ही घटना सिव्हिल लाइन्स भागातील असून, दिशाचे वडील जगदीश पाटनी यांनी सांगितले की दोन अनोळखी हल्लेखोरांनी घरावर ८ ते १० राउंड फायर केले.
View this post on Instagram
या अचानक झालेल्या गोळीबारामुळे परिसरात एकच गोंधळ उडाला आणि लोकांमध्ये भीतीचं वातावरण पसरलं. सुदैवाने या हल्ल्यात कोणीही जखमी झाले नाही, पण कुटुंबात दहशतीचे वातावरण आहे. पोलिसांनी तातडीने तपास सुरू करून सीसीटीव्ही फुटेज तपासायला सुरुवात केली आहे. हल्लेखोर कोण होते आणि त्यामागचं कारण काय होतं, याचा शोध सुरू आहे.
दरम्यान, सोशल मीडियावर कुख्यात गुंड गोल्डी बरार यांनी या हल्ल्याची जबाबदारी घेतल्याचं म्हटलं जात आहे. मात्र पोलिसांनी अद्याप याबाबत अधिकृत पुष्टी केलेली नाही. वरिष्ठ अधिकारी स्वतः या तपासात लक्ष घालत असून, आरोपींना पकडण्यासाठी वेगाने पावलं उचलली जात आहेत.
एकीकडे दिशा पटानी न्यूयॉर्कमध्ये आपल्या फॅशन आणि सौंदर्याने ग्लॅमर वर्ल्डमध्ये चर्चेत आहे, तर दुसरीकडे तिच्या कुटुंबाला या गोळीबारामुळे अस्वस्थ करणारा आणि धक्कादायक अनुभव आला आहे.
