पौड : मुळशी धरणातील पाणीसाठा ८५ टक्क्यांवर पोहोचला असून धरण परिसरात सुरू असलेल्या मुसळधार पावसामुळे पाण्याची आवक सातत्याने वाढत आहे. या पार्श्वभूमीवर धरणातील पाण्याची पातळी नियंत्रित ठेवण्यासाठी मुळशी धरणाच्या सांडव्यातून मुळा नदीत सोडण्यात येणारा विसर्ग वाढविण्याचा निर्णय घेण्यात आला आहे.

धरणातून सध्या ८,१०० क्युसेक वेगाने पाण्याचा विसर्ग सुरू असून, शुक्रवार (दि. २४) दुपारी १ वाजल्यापासून तो १०,००० क्युसेक करण्यात येणार असल्याची माहिती टाटा पॉवरच्या मुळशी धरण प्रशासनाने दिली आहे. पावसाचा जोर कायम राहिल्यास किंवा धरणात पाण्याची आवक आणखी वाढल्यास परिस्थितीनुसार विसर्गात बदल करण्यात येणार आहे.

धरण प्रशासनाने मुळा नदीकाठच्या नागरिकांना विशेष सतर्क राहण्याचे आवाहन केले आहे. नदीपात्रात कोणत्याही कारणास्तव उतरू नये, तसेच नदीपात्रात असलेले साहित्य, जनावरे किंवा इतर वस्तू तातडीने सुरक्षित ठिकाणी हलवाव्यात. सखल भागातील नागरिकांना याबाबत त्वरित सूचना देऊन आवश्यक ती खबरदारी घेण्याचे आवाहनही करण्यात आले आहे.

टाटा पॉवर, मुळशी धरणचे प्रतिनिधी सुरेश कोंडूभैरी यांनी ही माहिती प्रसिद्ध केली असून प्रशासनाच्या वतीने तहसीलदार विजयकुमार चोबे यांच्याकडून नागरिकांनी प्रशासनाच्या सूचनांचे काटेकोरपणे पालन करून सुरक्षिततेला प्राधान्य द्यावे, असे आवाहन करण्यात आले आहे.