नवी दिल्ली  – बुधवारी जरी भारतीय शेअर बाजाराचे निर्देशांक अल्प प्रमाणात का होईना वाढले असले तरी शेअर बाजारातील तयार कपडे आणि चर्मोद्योग कंपन्यावर नकारात्मक परिणाम झाला. या दोन्ही क्षेत्राचे निर्देशांक बर्‍याच प्रमाणात कोसळले.

या दोन्ही क्षेत्रातून अमेरिकेला मोठ्या प्रमाणात निर्यात होते. मात्र भारतीय वस्तूवर अमेरिकेने 50% आयात शुल्क लावल्यामुळे लघु पल्ल्यात तरी या उद्योगावर नकारात्मक परिणाम होण्याची शक्यता असल्यामुळे या दोन क्षेत्रातील कंपन्यांच्या शेअरची विक्री झाली असल्याचे विश्लेषकांनी सांगितले.

भारतातील वस्त्रोद्योग क्षेत्रातील सर्वात मोठ्या अरविंद कंपनीचा शेअर पावणेतीन टक्क्यांनी कोसळला. केपीआर मिल कंपनीचा शेअर दोन टक्क्यांनी कोसळला. त्याचबरोबर पर्ल ग्लोबल इंडस्ट्रीज, लक्स इंडस्ट्रीज, पेज इंडस्ट्रीज या कंपन्यांच्या शेअरच्या भावात ही घट झाली. चर्मोद्योग क्षेत्रातील एकेआय कंपनीचा शेअर 4.73 टक्क्यांनी, खादीम कंपनीचा शेअर दोन टक्क्यांनी कोसळला.

मात्र या उद्योगातील उद्योजकांनी सांगितले की, अमेरिकेच्या या निर्णयाचा परिणाम संबंधित उद्योगावर फक्त लघु पल्ल्यात होण्याची शक्यता आहे. अमेरिकेच्या निर्णयाचा अंदाज या क्षेत्रातील कंपन्यांना अगोदरच आला होता. त्यामुळे या कंपन्या पर्यायी बाजारपेठा शोधण्यासाठी प्रयत्न करीत आहेत. त्यामुळे लवकरच या नकारात्मक घडामोडीतून हे क्षेत्र सावरेल, असा अंदाज व्यक्त करण्यात आला.

त्याचबरोबर सध्या लावलेले शुल्क फक्त घोषणा आहे. प्रत्यक्ष अंमलबजावणी 21 दिवसानंतर होणार आहे. दरम्यानच्या काळामध्ये दोन्ही देशांदरम्यान चर्चा चालू राहणार आहे. अशा परिस्थितीत यातून मार्ग निघेल असे बर्‍याच उद्योजकांना आणि या क्षेत्रातील गुंतवणूकदारांना वाटत आहे.