Post Diwali Diet: दिवाळीत गोडधोड आणि तळलेल्या पदार्थांवर मारला ताव? पोट हलकं ठेवण्यासाठी आहारात समावेश करा ‘या’ ८ पदार्थांचा!
Post Diwali Diet दिवाळीनंतर शरीराला पुन्हा नियमित दिनचर्येची सवय लावणे महत्त्वाचे आहे. त्यासाठी अचानक उपाशी राहणे किंवा कठोर डाएट करण्याऐवजी संतुलित आहार घ्या. पुरेशी झोप, नियमित चालणे आणि हलका व्यायाम यांनाही महत्त्व द्या. पोटाचा त्रास सतत जाणवत असल्यास डॉक्टरांचा सल्ला घ्या.

Post Diwali Diet: दिवाळी म्हटलं की फराळ, मिठाई, चकली, करंजी, लाडू आणि वेगवेगळ्या स्वादिष्ट पदार्थांची मेजवानी आलीच! दिवाळीच्या दिवसांत अनेकजण आपल्या रोजच्या आहाराकडे दुर्लक्ष करून मनसोक्त गोडधोड आणि तळलेल्या पदार्थांचा आस्वाद घेतात. मात्र, सलग काही दिवस असे पदार्थ खाल्ल्यामुळे पोट जड होणे, गॅस, बद्धकोष्ठता आणि अॅसिडिटी यांसारख्या समस्या जाणवू लागतात. अशावेळी पुन्हा नियमित आहाराची सवय लावणे महत्त्वाचे ठरते.
मात्र, सणासुदीच्या काळात जास्त खाल्ल्यानंतर लगेच उपाशी राहणे किंवा कठोर डाएट सुरू करणे योग्य नाही. त्याऐवजी रोजच्या आहारात काही पौष्टिक पदार्थांचा समावेश करून पचनसंस्था सुरळीत ठेवण्यास मदत होऊ शकते. जाणून घेऊया दिवाळीनंतर आहारात कोणत्या आठ गोष्टींचा समावेश करावा.
१. दही आणि ताकाचा आहारात समावेश करा
दिवाळीनंतर आहारात साधे दही आणि ताकाचा समावेश करणे फायदेशीर ठरू शकते. दह्यामध्ये प्रथिने आणि कॅल्शियम असते. तसेच त्यातील चांगले जिवाणू आतड्यांच्या आरोग्यासाठी उपयुक्त ठरतात. दुपारच्या जेवणासोबत ताक घेतल्यास पचनाला मदत होऊ शकते. मात्र, दही किंवा ताक ताजे आणि स्वच्छ असावे.
२. हंगामी फळे खा
दिवाळीनंतर रोजच्या आहारात हंगामी फळांचा समावेश करा. पपई, पेरू, सफरचंद, संत्री आणि डाळिंब यांसारख्या फळांमध्ये फायबर, जीवनसत्त्वे आणि अँटीऑक्सिडंट्स असतात. यामुळे शरीराला आवश्यक पोषक घटक मिळतात. फळांचा ज्यूस पिण्याऐवजी संपूर्ण फळ खाणे अधिक चांगले. कारण संपूर्ण फळांमधून फायबरही मिळते.
३. हिरव्या पालेभाज्या खा
पालक, मेथी आणि चाकवत यांसारख्या हिरव्या पालेभाज्यांचा आहारात समावेश करा. या भाज्यांमध्ये फायबर, जीवनसत्त्वे आणि आवश्यक खनिजे असतात. पालेभाज्या पचनासाठी उपयुक्त ठरतात. तुम्ही या भाज्यांची भाजी, डाळ किंवा हलके सूप तयार करून खाऊ शकता.
४. मूगडाळीची खिचडी ठरेल चांगला पर्याय
दिवाळीत जास्त तळलेले आणि मसालेदार पदार्थ खाल्ल्यानंतर पोट जड वाटत असेल, तर काही दिवस हलका आणि सहज पचणारा आहार निवडा. मूगडाळीची खिचडी, दलिया आणि डाळ-भात हे चांगले पर्याय आहेत. या पदार्थांमधून शरीराला प्रथिने आणि कर्बोदके मिळतात. त्यामुळे पोटावर जास्त ताण न देता पौष्टिक आहार घेता येतो.

Post Diwali Diet
५. फायबरयुक्त पदार्थ खा
पचनसंस्था निरोगी ठेवण्यासाठी फायबर महत्त्वाचे आहे. ओट्स, दलिया, संपूर्ण धान्ये, चिया सीड्स आणि विविध भाज्यांचा आहारात समावेश करा. फायबरमुळे आतड्यांचे कार्य सुरळीत राहण्यास आणि बद्धकोष्ठतेचा त्रास कमी होण्यास मदत होते. मात्र, फायबरचे प्रमाण अचानक वाढवू नका. हळूहळू वाढवा आणि त्यासोबत पुरेसे पाणी प्या.
६. सुकामेवा आणि बियांचे सेवन करा
बदाम, अक्रोड, जवस आणि भोपळ्याच्या बियांमध्ये शरीरासाठी आवश्यक पोषक घटक असतात. यामध्ये हेल्दी फॅट्स, फायबर आणि इतर पोषक घटक मिळतात. सकाळच्या नाश्त्यात किंवा संध्याकाळच्या खाण्यात मर्यादित प्रमाणात सुकामेवा आणि बियांचा समावेश करू शकता.
७. दिवसभर पुरेसे पाणी प्या
सणासुदीच्या धावपळीत अनेकजण पुरेसे पाणी पिण्याकडे दुर्लक्ष करतात. त्यामुळे शरीरात पाण्याची कमतरता निर्माण होऊ शकते आणि बद्धकोष्ठतेचा त्रासही जाणवू शकतो. त्यामुळे दिवसभर थोड्या-थोड्या वेळाने पाणी प्या. याशिवाय नारळपाणी, ताक आणि लिंबूपाणी यांचाही आहारात समावेश करू शकता. मात्र, साखरयुक्त पॅकेज्ड पेये टाळा.
८. प्रथिनयुक्त पदार्थ खा
शरीराचे आरोग्य चांगले राखण्यासाठी प्रथिनांची आवश्यकता असते. त्यामुळे रोजच्या आहारात डाळी, पनीर, अंडी, सोया आणि दही यांसारख्या प्रथिनयुक्त पदार्थांचा समावेश करा. प्रथिने स्नायूंची दुरुस्ती आणि देखभाल करण्यास मदत करतात. त्यामुळे प्रत्येक मुख्य जेवणात प्रथिनांचा एखादा स्रोत असू द्या.
लक्षात ठेवा!
दिवाळीनंतर शरीराला पुन्हा नियमित दिनचर्येची सवय लावणे महत्त्वाचे आहे. त्यासाठी अचानक उपाशी राहणे किंवा कठोर डाएट करण्याऐवजी संतुलित आहार घ्या. पुरेशी झोप, नियमित चालणे आणि हलका व्यायाम यांनाही महत्त्व द्या. पोटाचा त्रास सतत जाणवत असल्यास डॉक्टरांचा सल्ला घ्या.





