Dhurandhar Movie: सुपरस्टार रणवीर सिंह अभिनीत ‘धुरंधर’ चित्रपटगृहांमध्ये प्रदर्शित झाला असून बॉक्स ऑफिसवर अक्षरशः धुमाकूळ घातला आहे. पहिल्याच दिवशी या चित्रपटाने २७ कोटींहून अधिक कमाई केली आहे. आता प्रेक्षकांमध्ये या चित्रपटाचे असे वेड पसरले आहे की, तिकीट खिडक्यांबाहेर प्रेक्षकांची प्रचंड गर्दी झाली आहे. रणवीर सिंह आणि सारा अर्जुन यांची प्रमुख भूमिका असलेला ‘धुरंधर’ रिलीज होताच बॉक्स ऑफिसवर हिट ठरला आहे. चित्रपटाच्या धमाकेदार ओपनिंगमुळे ‘धुरंधर’च्या शोची मागणी वाढली आहे. त्यामुळे मुंबईतील अनेक थिएटर्समध्ये तिकीट खिडक्यांवर लांबच लांब रांगा लागल्या होत्या. ‘धुरंधर’ची प्रचंड मागणी लक्षात घेऊन अनेक मल्टिप्लेक्स चेनने या चित्रपटाचे २४x७ शोज सुरू केले आहेत आणि तरीही सर्व शो हाऊसफुल जात आहेत. ‘धुरंधर’ची दमदार सुरुवात – रणवीर सिंहच्या नुकत्याच प्रदर्शित झालेल्या ‘धुरंधर’ने ओपनिंग डेला अनेक रेकॉर्ड तोडले आहेत. ट्रेड एक्सपर्ट्सनी या चित्रपटाची कमाई १८ ते २० कोटींच्या दरम्यान असेल असा अंदाज वर्तवला होता, पण ‘धुरंधर’ने हा अंदाज खोटा ठरवत पहिल्याच दिवशी नेट २७ कोटींची कमाई केली आहे. यामुळे ‘धुरंधर’ हा रणवीरच्या करिअरमधील सर्वात मोठा ओपनिंग चित्रपट ठरला आहे. यासोबतच, ‘धुरंधर’ २०२५ मधील दुसरी सर्वात मोठी ओपनिंग करणारा चित्रपट बनला आहे. पहिल्या क्रमांकावर अजूनही विकी कौशलचा ‘छावा’ आहे, ज्याने पहिल्या दिवशी ३१ कोटींचा गल्ला जमवला होता. ‘धुरंधर’च्या शोमध्ये वाढ – आदित्य धर दिग्दर्शित या स्पाय थ्रिलरने देशभरात खळबळ उडवून दिली असून मुंबईत तर याबद्दल जबरदस्त क्रेझ दिसत आहे. ‘धुरंधर’च्या शानदार ओपनिंगनंतर अनेक थिएटर्सनी चित्रपटाची मागणी पाहता मध्यरात्रीचे आणि पहाटेचे शो सुरू केले आहेत. यामुळे आता जवळपास २४ तास याचे शो सुरू आहेत. -PVR Sangam (चाकाला) मध्ये १:५० AM चा शो सुरू करण्यात आला आहे. -ईरोज मध्ये आयमॅक्स व्हर्जनसाठी ६ AM चा शो, मुव्हीमॅक्स सीऑन आणि पीव्हीआर सिटी मॉलमध्ये पहाटेचे स्लॉट्स जोडले गेले आहेत. -मेट्रो आयनॉक्स मध्ये १:३० AM चा शो सुरू करण्यात आला आहे. -तर, मॅक्सस सिनेमाज, भाईंदर येथे ८ लेट-नाईट आणि अर्ली मॉर्निंग शोज सुरू करण्यात आले आहेत. ॲडव्हान्स बुकिंगमध्ये नव्हता अपेक्षित प्रतिसाद – प्रदर्शित झाल्यानंतर ‘धुरंधर’ बॉक्स ऑफिसवर भलेही धुमाकूळ घालत असला तरी, ॲडव्हान्स बुकिंगच्या बाबतीत त्याने फारशी कमाल दाखवली नव्हती. ॲडव्हान्स बुकिंगमध्ये रणवीरच्या चित्रपटाने केवळ १४ कोटी रुपये कमावले होते. मात्र, पहिल्या शो नंतर सोशल मीडियावर सुरू झालेल्या सकारात्मक रिव्ह्यूच्या वादळानंतर सिनेप्रेमींनी चित्रपटगृहांकडे धाव घेतली. ट्रेड ॲनालिस्ट्सच्या मते, ‘धुरंधर’ वीकेंडमध्येच १०० कोटींच्या क्लबमध्ये प्रवेश करू शकतो.
