Dhruv Jurel : भारत आणि श्रीलंका यांच्यात सुरू असलेल्या दुसऱ्या कसोटी सामन्यात यष्टीरक्षक फलंदाज ध्रुव जुरेलच्या (Dhruv Jurel) दमदार खेळीचा जलवा पाहायला मिळाला. पहिल्या दिवसापासून मैदानावर तळ ठोकून असलेल्या जुरेलने दुसऱ्या दिवशी शानदार फलंदाजी करत आपल्या कसोटी कारकिर्दीतील दुसरे शतक पूर्ण केले.

जुरेलच्या (Dhruv Jurel) नाबाद ११५ धावांच्या खेळीमुळेच भारतीय संघाला पहिल्या डावात ५०३ धावांचा भलामोठा डोंगर उभारता आला. मात्र, या दिमाखदार शतकी खेळीनंतरही जुरेलच्या नावावर एका नकोशा विक्रमाची नोंद झाली आहे.

ध्रुव जुरेल (Dhruv Jurel) ९९ धावांपर्यंत अत्यंत आत्मविश्वासाने आणि वेगाने पोहोचला खरा, पण ९९ वरून शतकी टप्पा गाठताना त्याची चांगलीच धाकधूक वाढली. अवघी १ धाव काढून १०० चा आकडा गाठण्यासाठी त्याला तब्बल १३ चेंडू खर्ची घालावे लागले. त्यामुळे कसोटी क्रिकेटमध्ये ९९ वरून १०० धावा पूर्ण करण्यासाठी सर्वाधिक चेंडू खेळणाऱ्या भारतीय फलंदाजांच्या नकोशा यादीत जुरेल थेट तिसऱ्या स्थानी पोहोचला आहे.

या यादीत अव्वल स्थानी आर. अश्विन असून त्याने २०१६ मध्ये वेस्ट इंडिजविरुद्ध ९९ ते १०० धावांचा टप्पा गाठण्यासाठी १५ चेंडू खेळले होते. दुसऱ्या स्थानावर माजी फलंदाज मुरली विजय असून त्याने २०१४ मध्ये इंग्लंडविरुद्ध ट्रेंट ब्रिज कसोटीत १४ चेंडूंचा सामना केला होता.

या यादीत दिग्गज सचिन तेंडुलकर आणि व्हीव्हीएस लक्ष्मण यांचाही समावेश आहे, ज्यांनी नागपूर कसोटीत प्रत्येकी १२ चेंडू घेतले होते. आता याच पंक्तीत ध्रुव जुरेलचे (Dhruv Jurel) नावही जोडले गेले आहे.

सामन्याबद्दल बोलायचे झाले तर नाणेफेक जिंकून प्रथम फलंदाजी करणाऱ्या भारतीय संघाकडून देवदत्त पडिक्कलने ११७ धावांची शतकी खेळी केली. याशिवाय ऋषभ पंतने ६३, शुबमन गिलने ५०, यशस्वी जैस्वालने ४५ आणि रवींद्र जडेजाने ४३ धावांचे योगदान देत संघाची धावसंख्या ५०३ धावांवर पोहोचवली.