बीड : वाल्मीक कराड हा धनंजय मुंडेंचा निकटवर्तीय आहे. प्रकरणाचा तपास पूर्ण होईपर्यंत धनंजय मुंडेंनी राजीनामा द्यावा, अशी मागणी राष्ट्रवादी काँग्रेसचे नेते आणि माजलगावचे आमदार प्रकाश सोळंके यांनी केली आहे. याबाबत मी मुख्यमंत्री देवेंद्र फडणवीस आणि उपमुख्यमंत्री अजित पवार यांच्याशी देखील बोललो असल्याचे सोळंके यांनी सांगितले.

कराड धनंजय मुंडेंचे निकटवर्तीय आहेत. बीड प्रकरणाचा पूर्ण तपास होईपर्यंत आणि आरोपीला शिक्षा होईपर्यंत धनंजय मुंडे यांनी मंत्रिपदावरून दूर व्हावे. नाहीतर पक्षश्रेष्ठींनी त्यांना काढावे. तपास निपक्षपातीपणाने होईल अशी जनतेला हमी द्यावी, अशी मागणी सोळंके यांनी केली. मी त्यांच्या राजीनाम्याची जाहीरपणे मागणी केली आहे. मी त्या मागणीवर ठाम आहे. मुख्यमंत्री आणि अजितदादांना भेटून आम्ही हीच मागणी केली होती. त्याबाबतच्या निर्णय हा पक्षश्रेष्ठींवर अवलंबून आहे, असेही ते म्हणाले.

सोळंके पुढे म्हणाले, संतोष देशमुख यांच्या हत्येला 24 दिवस उलटले. सर्व तपास यंत्रणा कामाला लावून सुद्धा अजुनही आरोपी मिळून आलेले नाहीत, हे तपास यंत्रणांचे अपयश आहे. अद्यापही आरोपींना अटक होत नाही, हे दुर्दैवी आहे. त्यामुळे जनतेच्या मनात पोलिस प्रशासनाविषयी आक्रोश आहे. या आरोपींना कुणाचा तरी वरदहस्त, मोठ्या प्रमाणात पैसा असल्यामुळे आरोपींना फरार राहण्यास मदत मिळत असल्याचा दावाही सोळंकेंनी म्हटले.