Dhananjay Munde resigns ।  राज्याचे मुख्यमंत्री देवेंद्र फडणवीस आणि उपमुख्यमंत्री अजित पवार यांच्यात देवगिरी येथे बैठक झाल्याची माहिती आहे. या बैठकीला धनंजय मुंडे,  सुनील तटकरे, प्रफुल पटेल हे देखील उपस्थित होते. या बैठकीचा तपशील बाहेर आलेला नाही. मात्र, धनंजय मुंडेंच्या राजीनाम्यासंदर्भात ही चर्चा झाल्याचे सांगण्यात येत आहे.

देशमुखांचे फोटो व्हायरल झाल्याने मुंडेंच्या अडचणीत वाढ  Dhananjay Munde resigns ।

बीडच्या मस्साजोग गावाचे सरपंच संतोष देशमुख यांच्या हत्या प्रकरणातील फोटो समोर आल्यानंतर मराठवाड्यात वातावरण आणखी तापल्याचे  दिसत आहे. करुणा शर्मा धनंजय मुंडे यांच्या विरोधात आक्रमक आहेत. सामाजिक कार्यकर्त्या अंजली दमानिया यांनी देखील धनंजय मुंडे यांच्या विरोधात आघाडी उघडली होती. त्यातच संतोष देशमुखांचे फोटो व्हायरल झाल्यानंतर धनंजय मुंडेंच्या समोरील अडचणीत वाढ झाली आहे.

देवेंद्र फडणवीस आणि अजित पवार यांच्यातील बैठक काल रात्री 8.50 वाजता मिनिटांनी चर्चेला सुरुवात झाली होती. त्यानंतर साडे दहा वाजता ही बैठक संपली. या दीड तासात नेमकं काय चर्चा झाली. धनंजय मुंडे यांचा राजीनामा घेतला जाईल का असा प्रश्न आहे. धनंजय मुंडे यांच्या विरोधात विरोधी पक्षांकडून घोषणाबाजी करण्यात आली होती. अर्थसंकल्पीय अधिवेशन हे धनंजय मुंडे यांच्या विरोधात गाजेल अशी शक्यता आहे. त्यामुळे सत्ताधारी पक्ष एक पाऊल मागं जाऊन धनंजय मुंडे यांचा राजीनामा घेतो का ते पाहावं लागेल.

देवेंद्र फडणवीस हे राज्याचे मुख्यमंत्री आणि गृहमंत्री आहेत. स्वत: ते अजित पवार यांच्या शासकीय निवासस्थानी जात असतील तर ती मोठी घडामोड मानली जात आहे. 9 डिसेंबरपासून सुरु झालेलं प्रकरण वाढत चाललं आहे. सरकारच्या अडचणी वाढू नये या दृष्टीनं देवेंद्र फडणवीस यांनी त्यांची भूमिका अजित पवार यांच्याकडे ठेवलेली आहे.

अजित पवारांवर दबाव वाढला Dhananjay Munde resigns ।
धनंजय मुंडे यांच्या राजीनाम्यासंदर्भातील दबाव राष्ट्रवादी काँग्रेसवर वाढत चाललेला आहे. अजित पवारांची राष्ट्रवादी काँग्रेस काय निर्णय घेणार याकडे सर्वांचे  लक्ष लागले आहे. लोकभावना लक्षात घेता अजित पवार यांच्यावर दबाव वाढताना दिसून येत आहे. धनंजय मुंडे स्वत: हून राजीनामा देणार का हे पाहावं लागणार आहे. देवेंद्र फडणवीस यांच्या भेटीनंतर अजित पवार काय निर्णय घेतात हे पाहावं लागेल.