Devendra Fadnavis – धर्मादाय संस्था क्षेत्रात कार्य करताना सेवाभाव कसा असावा, हे दीनानाथ मंगेशकर रुग्णालयाने दाखवून दिले. या रुग्णालयाने सेवेचा सौदा न करता सेवाभाव कायम ठेवून लाखो रुग्णांना आरोग्यसेवा देण्याचे कार्य केले, हाच अनुभव लताआशा रुग्णालयातूनही मिळेल, असा विश्वास मुख्यमंत्री देवेंद्र फडणवीस यांनी व्यक्त केला. लता मंगेशकर मेडिकल फाउंडेशनतर्फे नांदोशी येथे उभारण्यात येणाऱ्या लताआशा मंगेशकर इन्स्टिट्यूट ऑफ मेडिकल सायन्सेस या रुग्णालयाच्या कोनशिला समारंभात ते बोलत होते. या वेळी उपमुख्यमंत्री एकनाथ शिंदे, उच्च व तंत्र शिक्षणमंत्री चंद्रकांत पाटील, विधान परिषद उपसभापती डॉ. नीलम गोऱ्हे, महापौर मंजुषा नागपुरे, राष्ट्रीय स्वयंसेवक संघाचे सरसंघचालक डॉ. मोहन भागवत, लता मंगेशकर मेडिकल फाउंडेशनचे अध्यक्ष पंडित हृदयनाथ मंगेशकर, ज्येष्ठ गायिका उषा मंगेशकर, विश्वस्त डाॅ. धनंजय केळकर आदी उपस्थित होते. लता मंगेशकर मेडिकल फाउंडेशनतर्फे नांदोशीत ‘लताआशा मंगेशकर इन्स्टिट्यूट ऑफ मेडिकल सायन्सेस’चा शुभारंभ. आज प्रत्येक व्यक्तीला परवडणारी उत्तम प्रकारची आरोग्य सुविधा मिळण्याची गरज आहे. लताआशा या रुग्णालयात विविध प्रकारच्या चिकित्सा पद्धती, रुग्ण पुनर्वसन केंद्र आणि कर्करोग केंद्र असल्याने रुग्णांवर चांगले उपचार होतील, असा विश्वास फडणवीस यांनी व्यक्त केला. एकनाथ शिंदे म्हणाले, की मंगेशकर कुटुंबाने गाण्यापलिकडे जाऊन राष्ट्रभक्तीच्या भावनेने सेवा कार्य केले. त्यामुळे इथे येणाऱ्या रुग्णांना माणुसकीची ऊब मिळेल. या सेवाकार्यास शासनाकडून सहकार्य मिळेल. मोहन भागवत म्हणाले, लता मंगेशकर आणि आशा भोसले यांनी अखंड स्वरसेवा केली. म्हणून त्यांचे स्वर मानवी वेदना दूर करणारे आहेत. सर्व प्रकारची चिकित्सा एकाच ठिकाणी उपलब्ध झाली, तर रुग्णावर होणारा खर्च कमी होतो. मिलिंद कुलकर्णी यांनी हृदयनाथ मंगेशकर यांचे मनोगत सादर केले. आशाताईंचे सुपुत्र आनंद भोसले यांनी मनोगत व्यक्त केले. प्रास्ताविकात डॉ. धनंजय केळकर यांनी रुग्णालय प्रकल्पाची माहिती दिली. या वेळी आमदार भीमराव तापकीर, सुनील कांबळे, सिद्धार्थ शिरोळे, बापू पठारे, हेमंत रासने आदी उपस्थित होते.
