Sunetra Pawar : दिवंगत अजित पवार यांच्यानंतर राष्ट्रवादी काँग्रेसची धुरा कोणाकडे जाणार, दोन्ही राष्ट्रवादी काँग्रेस पक्ष एकत्र येणार का? यासंदर्भात दोन्ही राष्ट्रवादीच्या नेत्यांकडून सुरू असलेले दावे प्रतिदावे, विमान अपघाताविषयी आमदार रोहित पवार यांनी उपस्थित केलेला घातपाताचा संशय या आणि यासारख्या अनेक प्रश्नांमुळे महाराष्ट्राचे राजकारण चांगलेच ढवळून निघाले आहे. अजित पवार महाराष्ट्राच्या राजकारणातील प्रभावी नेते होते. त्यांच्या निधनाला आता २० दिवस उलटून गेले असले तरी अद्यापही या धक्क्यातून अजूनही राष्ट्रवादीतील काही नेते सावरलेले नाहीत. अमोल मिटकरी हे विमान अपघाताबाबत अनेक दावे करताना दिसत आहेत. अजित पवार यांच्यानंतर त्यांच्या पत्नी सुनेत्रा पवार यांनी उपमुख्यमंत्री पदाची शपथ घेतली. अजित पवार यांच्याकडे असलेले अर्थ खाते वगळून उत्पादन शुल्क, क्रीडा व युवक कल्याण आणि औकाफ ही तीन खात्यांची जबाबदारी सोपविण्यात आली. अर्थखात्याची जबाबदारी मुख्यमंत्री देवेंद्र फडणवीस यांनी ठेवली. आता याबाबत महत्वाची माहिती समोऱ आली आहे. येत्या २३ फेब्रुवारीपासून राज्याच्या अर्थसंकल्पीय अधिवेशनाला सुरुवात होत आहे. अर्थसंकल्प ६ मार्चला मांडला जाणार आहे. मुख्यमंत्री देवेंद्र फडणवीस राज्याचा अर्थसंकल्प मांडतील. त्यानंतर चार ते पाच महिन्यांत पुन्हा अर्थखाते हे राष्ट्रवादी काँग्रेसला दिले जाणार आहे, अशी माहिती सूत्रांकडून मिळत आहे. अलीकडेच, उपमुख्यमंत्री सुनेत्रा पवार, पार्थ पवार आणि जय पवार यांची मुख्यमंत्री देवेंद्र फडणवीस यांच्यासोबत बैठक पार पडली. याच बैठकीत अर्थखाते पुन्हा राष्ट्रवादी काँग्रेसकडे देण्याचा निर्णय झाला असल्याची माहिती आहे. त्यामुळे अर्थ व नियोजन हे महत्वाचे खाते पुन्हा एकदा राष्ट्रवादी काँग्रेस पक्षाला देण्यासाठी हालचाली सुरू झाल्या आहेत. sunetra pawar अर्थ आणि नियोजन हे महत्त्वाचे खाते पुन्हा राष्ट्रवादीला सोपवून अजित पवारांचा वारसा पुढे नेण्याचा विचार महायुती सरकारमध्ये सुरू असल्याचे बोलले जात आहे. अजित पवार यांनी तब्बल ११ वेळा राज्याचा अर्थसंकल्प मांडला आहे. मात्र, त्यांच्या आकस्मिक निधनानंतर हे महत्त्वाचे खाते मुख्यमंत्र्यांनी स्वतःकडे ठेवले असून, अधिवेशन झाल्यानंतर ते पुन्हा राष्ट्रवादी काँग्रेस पक्षाकडे जाणार असल्याचे सांगितले जात आहे. उपमुख्यमंत्री सुनेत्रा पवार राष्ट्रवादीच्या राष्ट्रीय अध्यक्षा होणार? राष्ट्रवादी काँग्रेस पक्षाचा राष्ट्रीय अध्यक्ष कोण होणार यावर बरीच चर्चा सुरुवातीच्या वेळी झाली. माध्यमांमध्ये कार्याध्यक्ष प्रफुल्ल पटेल यांच्या नावाची चर्चा असल्याचे सांगितले होते. पण स्वतः प्रफुल्ल पटेल यांनी यामध्ये तथ्य नसल्याचे म्हणत सुनेत्रा पवार यांच्या नावाचा विचार सुरू असल्याचे स्पष्ट केले. त्यामुळे येत्या काही दिवसांत पक्षाच्या राष्ट्रीय अध्यक्षाची निवड होणार असून, उपमुख्यमंत्री सुनेत्रा पवार याच राष्ट्रीय अध्यक्षा होतील, असे समोर आले असून त्यांच्या नावाचा पक्षातील कोणाचाही विरोध नाही. हेही वाचा : Shirur accident News : भीषण अपघातात तिघांचा जागीच मृत्यू; काळे कुटुंबावर काळाचा घाला
