PGI : दिल्लीतील एम्सनंतर देशातील प्रमुख वैद्यकीय संस्थांपैकी एक असलेल्या चंदीगडमधील पीजीआय (PGI) संस्थेत ज्येष्ठ मानसोपचारतज्ज्ञ डॉ. ग्रोवर यांच्या राजीनाम्यावरून वाद निर्माण झाला आहे. सहा महिन्यांची अतिरिक्त रजा न मिळाल्याने नाराज झालेल्या डॉ. ग्रोवर यांनी राजीनामा दिला होता.

मात्र, पीजीआय प्रशासनाने त्यांचा राजीनामा स्वीकारण्यास नकार दिला. त्यानंतर त्यांनी पीजीआयचे प्रशासक, अध्यक्ष आणि संचालक यांच्या विरोधात केंद्रीय प्रशासकीय न्यायाधिकरणात (CAT) कडे याचिका दाखल केली.

या याचिकेवर सुनावणी करताना CAT ने डॉ. ग्रोवर यांचा राजीनामा नाकारणारा पीजीआयचा आदेश रद्द केला. मात्र, न्यायाधिकरणाने प्रशासनाला त्यांचा राजीनामा किंवा स्वेच्छानिवृत्ती तातडीने मंजूर करण्याचे निर्देश दिलेले नाहीत. या प्रकरणावर तीन आठवड्यांत विचार करून निर्णय घेतला जाणार असल्याचे स्पष्ट करण्यात आले आहे.

ऑस्ट्रेलियात फेलोशिपसाठी जाण्याची होती इच्छा

डॉ. ग्रोवर यांनी CAT मध्ये दाखल केलेल्या याचिकेनुसार, त्यांना ऑस्ट्रेलियातील मेलबर्न येथील रॉयल कॉलेज ऑफ सायकियाट्रीमध्ये फेलोशिपसाठी जायचे होते. त्यासाठी त्यांनी परदेशात जाण्याची रजा मागितली होती.

मिळालेल्या माहितीनुसार, डॉ. ग्रोवर ३ फेब्रुवारी २०२५ रोजी ऑस्ट्रेलियाला गेले होते. पुढे त्यांनी २५ सप्टेंबर २०२५ ते ३ फेब्रुवारी २०२६ आणि त्यानंतर २ ऑगस्ट २०२६ पर्यंत रजा वाढवून देण्याची मागणी केली. मात्र, प्रशासनाने त्यांची मागणी फेटाळली.

भारतात परतल्यानंतर राजीनामा

डॉ. ग्रोवर २ फेब्रुवारी २०२६ रोजी भारतात परतले. त्यानंतर त्यांनी पीजीआय प्रशासनाला तीन महिन्यांची नोटीस देत स्वेच्छानिवृत्ती मंजूर करावी किंवा आपला राजीनामा स्वीकारावा, अशी मागणी केली होती. मात्र, प्रशासनाने त्यांचा राजीनामा स्विकारला नाही.

पीजीआय प्रशासनाच्या म्हणण्यानुसार, अलीकडच्या काळात दोन डॉक्टरांनी संस्था सोडली असून, आधीच प्राध्यापकवर्गाची कमतरता आहे. त्यामुळे डॉ. ग्रोवर यांना स्वेच्छानिवृत्ती देणे योग्य ठरणार नसल्याचे कारण दिले आहे.

वयाच्या ५३ व्या वर्षी निवृत्तीची मागणी

डॉ. ग्रोवर यांचे वय सध्या ५३ वर्षे असून, पीजीआयमधील प्राध्यापकांच्या निवृत्तीचे वयोमर्यादा ६५ वर्षे आहे. त्यांनी नियमित निवृत्तीच्या वयाच्या आधीच स्वेच्छानिवृत्तीची मागणी केली आहे.

डॉ. ग्रोवर यांनी १ जानेवारी २००० रोजी पीजीआयमध्ये कनिष्ठ निवासी डॉक्टर म्हणून कारकिर्दीला सुरुवात केली होती. त्यानंतर सहाय्यक प्राध्यापक आणि सहयोगी प्राध्यापक म्हणून पदोन्नती मिळवत ते १२ मे २०१७ रोजी प्राध्यापक झाले. मानसोपचार क्षेत्रातील प्रसिद्ध तज्ज्ञ म्हणून डॉ. ग्रोवर यांची ओळख आहे.

विशेषतः कॅटाटोनिया या आजाराच्या उपचारांमधील त्यांच्या कामाची आंतरराष्ट्रीय स्तरावर दखल घेतली गेली आहे. आता CAT च्या निर्देशानंतर पीजीआय प्रशासन डॉ. ग्रोवर यांच्या राजीनाम्याबाबत किंवा स्वेच्छानिवृत्तीच्या मागणीबाबत काय निर्णय घेते, याकडे लक्ष लागले आहे.

Kieron Pollard : कायरोन पोलार्डची नवी इनिंग सुरू; मुंबई इंडियन्सकडून मिळाली मोठी जबाबदारी