पुणे : दीनानाथ मंगेशकर रुग्णालयाच्या बेजबाबदारपणामुळे आणि पैशाच्या हव्यासामुळे तनिषा भिसे गर्भवतीचा मृत्यू झाल्याचे राज्य शासनाकडून नेमण्यात आलेल्या पाच सदस्यांची समितीच्या अहवालात उघड झाले आहे. हा अहवाल महिला आयोगाच्या अध्यक्षा रुपाली चाकणकर यांनी पोलीस आयुक्तांना सादर केला. यावेळी उपायुक्त संभाजी कदम आणि स्मार्तना पाटील उपस्थित होते. यासंदर्भात पोलीस आयुक्तालयात एक आढवा बैठक घेण्यात आली. यामध्ये ससून रुग्णालयासह इतर विभागांचे अधिकारी उपस्थित होते. दरम्यान सादर करण्यात आलेल्या अहवालात म्हटले आहे की, रुग्णालयाने रुग्णावर उपचार करणे अपेक्षित होते ते उपचार मिळाले नाहीत. रुग्णालयाने हलगर्जीपणा केलेला आहे. रुग्णालयाने त्वरीत उपचार केले असते तर रुग्णाचा प्राण वाचला असता यासंदर्भात रुपाली चाकणकर माध्यमांशी बोलताना म्हणाल्या. रुपाली चाकणकर म्हणाल्या, हा राज्य समितीचा अहवाल आहे, इतर अहवाल आल्यानंतर रुग्णालयावर कारवाई होणार आहे. यामध्ये कोणाला वाचवायच कोणाला सोडायच असा काहीही विषय नाही. धर्मादाय आयुक्तांची नियमावली दीनानाथ रुग्णालयाने पाळली नाही. यातील एक म्हणजे रुग्णालयाच्या नावासमोर धर्मादाय असे लिहणे आवश्यक होते. रुग्ण दीनानाथमध्ये सकाळी ९ वाजून १ मिमनिटांनी गेला होता. नातेवाईकांनी डॉक्टरांशी संपर्क साधला होता. डॉक्टरांनी सर्जरीसाठी स्टाफला सूचना दिल्या होत्या. ऑपरेशन थिएटरमध्ये जाण्यापुर्वी दहा लाख रुपयांची मागणी करण्यात आली. कुटूंबियांनी तीन लाख रुपये आहेत असे रुग्णालयाला सांगितले होते. रुग्ण अडीच वाजता रुग्णालयातून बाहेर पडला. या पाच तासात रुग्णावर प्राथमिक उपचारही केले नाहीत. यानंतर रुग्णाच्या नातेवाईकांनी रुग्णाला ससूनमध्ये नेले. तेथून ते १५ मिनिटांत बाहेर आले आणि सुर्या हॉस्पिटलमध्ये नेल. दुसऱ्या दिवशी डिलिव्हरी झाली रक्तस्त्राव झाला आणि रुग्णाचा मृत्यू झाला. तिन्ही एकत्रित अहवालानंतर पोलीस काय कारवाई करायचा हा निर्णय घेतील. इतर दोन अहवालही लवकरच सादर होतील, असे रुपाली चाकणकर म्हणाल्या. पोलिस लिहणार ससूनच्या अधिक्षकांना पत्र … गर्भवती तनिषाला साडे पाच तास थांबवून ठेवले आणि उपचारही केले नाहीत ही प्रथमदर्शनी माहिती पोलिसांना सीसीटिव्ही तपासल्यानंतर प्राप्त झाली आहे.या प्रकरणी थेट दीनानाथ मंगेशकर रुग्णालयावर कारवाई करता येत नाही म्हणून पुणे पोलिस ससून रुग्णालयाच्या वैद्यकीय अधीक्षकांना पत्र लिहिणार आहेत. दीनानाथ रुग्णालय येथे घडलेल्या प्रकरणाची चौकशी करून पोलिसांना अहवाल सादर करावा असे या पत्रात सांगितले जाणार आहे. रुग्णालयाने रुग्णाच्या कुटुंबीय यांच्याकडून अनामत रक्कम ठेवण्याची मागणी केली होती का? याचीही चौकशी केली जाणार आहे.
