Delhi Violence। दिल्लीतील तुर्कमान गेटजवळ बुधवारच्या मध्यरात्री मोठी दंगल उसळल्याची माहिती समोर येत आहे. एमसीडीने फैज-ए-इलाही दर्ग्याबाहेर असलेले अतिक्रमण हटवण्यासाठी बुलडोझर कारवाई सुरू करत एक लग्न मंडप आणि एक निदान केंद्र पाडले. त्यानंतर या भागात मोठा गोंधळ निर्माण झाला. त्यामुळे या परिसरात शांतता राखण्यासाठी मोठा पोलिस बंदोबस्त तैनात करण्यात आला. दरम्यान, तिथे जमलेल्या जमावाने पोलिसांवर हल्ला करत दगडफेक केली. प्रत्युत्तरादाखल पोलिसांनी आक्रमक जमावावर अश्रुधुराचे नळकांडे फोडले. राष्ट्रीय राजधानीत पोलिस आणि निमलष्करी दलांनी अनेक अश्रुधुराचे नळकांडे फोडल्याची माहिती समोर येत आहे. या सर्व गोंधळात रात्री उशिरा फैज-ए-इलाही मशिदीजवळील परिस्थिती बिघडली. दिल्ली पोलिसांनी गर्दी पांगवण्यासाठी मोठी कारवाई केली. पोलिसांनी तुर्कमान गेटच्या अरुंद रस्त्यांमध्ये प्रवेश करत दंगलखोरांना पांगवण्याचा प्रयत्न केला. तुर्कमान गेट परिसरातील परिस्थिती सध्या नियंत्रित Delhi Violence। दिल्लीचे डीसीपी एन. व्हॅल्सन यांनी माध्यमांना याविषयी माहिती दिली. त्यांना प्रशासनाने आधीच माहिती दिली होती की अतिक्रमण हटवण्याची कारवाई संध्याकाळी ६ ते ७ दरम्यान केली जाईल. पोलिसांनी आधीच खबरदारीची तयारी केली होती. मोठा पोलिस बंदोबस्त तैनात केला होता. रात्री उशिरा काही लोकांनी परिस्थिती चिघळवण्याचा प्रयत्न केला, परंतु पोलिसांनी कारवाई करत परिस्थिती नियंत्रणात आणली. परिसरातील परिस्थिती सध्या सामान्य आहे. फैज-ए-इलाही दर्ग्याजवळील अतिक्रमण वाद काय ? Delhi Violence। एका स्वयंसेवी संस्थेने रामलीला मैदानाच्या जमिनीवर अतिक्रमण केल्याचा आरोप करत एमसीडीकडे तक्रार दाखल केली होती आणि ती त्वरित हटवण्याची मागणी केली होती. एमसीडीने तक्रारीची दखल घेतली. त्यानुसार १६ ऑक्टोबर २०२५ रोजी एल अँड डीओ, डीडीए आणि एमसीडीने संयुक्त सर्वेक्षण केले. सर्वेक्षणात २,५१२ चौरस फूट पीडब्ल्यूडी जमिनीवर आणि पदपथांवर बेकायदेशीर अतिक्रमण असल्याचे उघड झाले. यानंतर, दुसऱ्या एका संस्थेने अतिक्रमणाविरुद्ध दिल्ली उच्च न्यायालयात याचिका दाखल केली. १२ नोव्हेंबर २०२५ रोजी उच्च न्यायालयाने एमसीडीला तीन महिन्यांत अतिक्रमण हटवण्याची कारवाई करण्याचे निर्देश दिले. तसेच सर्व पक्षांना सुनावणी घेण्याचे निर्देश दिले. यानंतर, ६-७ जानेवारीच्या रात्री कारवाईत अडथळा आणण्यासाठी परिसरात मोठा जमाव जमला. तथापि, पोलिसांच्या सतर्कतेमुळे परिस्थिती नियंत्रणात आली.
