Delhi Students Protest : दिल्लीतील जंतर-मंतरवर विद्यार्थी आणि विविध राजकीय संघटनांकडून पुन्हा एकदा आंदोलन करण्यात येत आहे. निवडणूक आयोगातील कथित मतभेदांच्या पार्श्वभूमीवर मुख्य निवडणूक आयुक्त ज्ञानेश कुमार यांच्या राजीनाम्याची मागणी आंदोलकांकडून करण्यात येत आहे. या आंदोलनासाठी पोलिसांची परवानगी घेण्यात आली नसल्याची माहिती समोर आली आहे.

परवानगी नसल्याने पोलिसांनी आंदोलनस्थळी कारवाई सुरू केली असून, काही विद्यार्थी आंदोलकांना ताब्यात घेण्यास सुरुवात केली. यावेळी आंदोलक विद्यार्थी आणि पोलिसांमध्ये झटापट झाल्याचे पाहायला मिळाले. त्यामुळे जंतर-मंतर परिसरात काही काळ तणावाचे वातावरण निर्माण झाले.

या आंदोलनात आम आदमी पक्षाचे नेते आणि दिल्लीचे माजी मंत्री सौरभ भारद्वाज हेदेखील सहभागी झाले होते. पोलिसांनी त्यांनाही ताब्यात घेतल्याची माहिती आहे. दरम्यान, आंदोलकांकडून मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यात येत असून, निवडणूक आयोगाच्या कार्यपद्धतीवरही प्रश्न उपस्थित केले जात आहेत.

या पार्श्वभूमीवर जंतर-मंतर परिसरात पोलिसांचा मोठा बंदोबस्त तैनात करण्यात आला आहे. आंदोलनाला परवानगी नसल्याने पोलिसांकडून आंदोलकांना हटवण्याची कारवाई सुरू आहे.