Delhi News : मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी कॉकरोच जनता पार्टी (CJP) आणि विद्यार्थी संघटनांनी 10 ऑक्टोबरला जंतर-मंतर येथे आंदोलनाची घोषणा केली आहे. या पार्श्वभूमीवर दिल्लीमध्ये सुरक्षा व्यवस्था कडक करण्यात आली आहे. मध्य दिल्लीतील जनपथ-कर्तव्य पथ क्रॉसिंगच्या चार किलोमीटर परिसरात आज (9 ऑक्टोबर) रात्री 10 वाजल्यापासून 10 ऑक्टोबरच्या रात्री 10 वाजेपर्यंत मोबाइल इंटरनेट सेवा बंद राहणार आहे.

दिल्ली पोलिसांनी CJP आणि काही विद्यार्थी संघटनांना 10 ऑक्टोबरच्या आंदोलनासाठी परवानगी नाकारली आहे. आंदोलनाची माहिती उशिरा देण्यात आली आणि यापूर्वीच्या आंदोलनात नियमांचे उल्लंघन झाल्याचे पोलिसांनी कारण दिले आहे.

चार किलोमीटर परिसरात मोबाइल इंटरनेट बंद

गृह मंत्रालयाच्या आदेशानुसार जनपथ-कर्तव्य पथ क्रॉसिंगच्या चार किलोमीटरच्या परिसरात मोबाइल इंटरनेट सेवा बंद ठेवण्याचा निर्णय घेण्यात आला आहे. या निर्णयाचा परिणाम मोबाइल इंटरनेटच्या विविध तंत्रज्ञानावर होणार आहे. पोलिसांनी दूरसंचार कंपन्यांना आदेशाची अंमलबजावणी करण्यास सांगितले आहे.

57 मेट्रो स्थानकांवर प्रवेश-निर्गमन बंद

आंदोलनाच्या पार्श्वभूमीवर दिल्ली मेट्रोच्या 57 स्थानकांवरील प्रवेश आणि बाहेर पडण्याचे दरवाजे 9 ऑक्टोबरच्या रात्री 9 वाजल्यापासून बंद ठेवण्यात येणार आहेत. परिस्थिती सामान्य होईपर्यंत हे निर्बंध लागू राहतील. या स्थानकांवरून जाणाऱ्या मेट्रोची वारंवारताही परिस्थितीनुसार कमी केली जाऊ शकते.

राजीव चौक, नवी दिल्ली, सेंट्रल सेक्रेटरिएट, पटेल चौक आणि काश्मिरी गेट यांसारख्या महत्त्वाच्या स्थानकांचाही या निर्बंधांमध्ये समावेश आहे. मात्र, बहुतांश स्थानकांवर इंटरचेंजची सुविधा सुरू राहणार असून नवी दिल्ली मेट्रो स्थानकाला त्यातून वगळण्यात आले आहे.

CJP ने कथित ‘व्होट चोरी’च्या मुद्द्यावरून मुख्य निवडणूक आयुक्त ज्ञानेश कुमार यांच्या राजीनाम्याची मागणी करत 10 ऑक्टोबरला आंदोलनाची घोषणा केली आहे. संभाव्य गर्दी आणि कायदा-सुव्यवस्थेचा प्रश्न निर्माण होऊ नये, यासाठी दिल्ली पोलिसांनी हे निर्बंध लागू केले आहेत.