नवी दिल्ली : कथित मद्य धोरण घोटाळ्या प्रकरणी दिल्लीचे मुख्यमंत्री अरविंद केजरीवाल काही दिवसांपासून तुरुंगात आहेत. दिल्ली उच्च न्यायालयाने अरविंद केजरीवाल यांच्या जामिनासंदर्भात अंतिम निकाल आज (25 जून) दिला असून दिल्लीच्या राउज एवेन्यू न्यायालयाने दिलेल्या जामिनावर दिल्ली उच्च न्यायालयाने स्थगिती कायम ठेवली आहे. तसेच या प्रकरणात सविस्तर सुनावणी होण्याची गरज असल्याचे दिल्ली उच्च न्यायालयाने म्हटले आहे. त्यामुळे आता अरविंद केजरीवाल यांचा तुरुंगातील मुक्काम वाढला आहे. या सुनावणीवेळी दिल्ली उच्च न्यायालयाने ट्रायल कोर्टावर ताशेरे ओढले आहेत. अरविंद केजरीवाल यांच्या जामिनावरील स्थगितीचा दिल्ली उच्च न्यायालयाचा अंतिम निर्णय येत नाही तो पर्यंत अरविंद केजरीवाल यांना जामीन देता येणार नाही, असे सर्वोच्च न्यायालयाने म्हटले होते. तसेच सर्वोच्च न्यायालयाने या प्रकरणाची पुढील सुनावणी बुधवारी २६ जून रोजी निश्िचत केली आहे. आता दिल्ली उच्च न्यायालयाने जामिनाला स्थगिती कायम ठेवल्यामुळे उद्या सर्वोच्च न्यायालयात होणाऱ्या सुनावणीकडे आपच्या कार्यकर्त्याचे लक्ष लागलेले आहे.
