Delhi Blasts: सोमवारी संध्याकाळी दिल्लीतील लाल किल्ल्याजवळ झालेल्या भयानक स्फोटाने देश हादरला आहे. या घटनेत अनेकांचा मृत्यू झाल्याची माहिती मिळाली असून पोलिसांकडून सर्व कोनातून तपास सुरू आहे. प्राथमिक चौकशीत या स्फोटामागे दहशतवादी कटाचा संशय व्यक्त केला जात आहे. या दुर्दैवी घटनेवर बॉलिवूडसह साउथ इंडस्ट्रीतील अनेक कलाकारांनी दुःख व्यक्त केले आहे.

रवीना टंडनची प्रतिक्रिया

बॉलिवूड अभिनेत्री रवीना टंडन हिने या घटनेवर इंस्टाग्रामवर प्रतिक्रिया दिली आहे. तिने आपल्या इंस्टाग्राम स्टोरीवर दिल्ली स्फोटाशी संबंधित पोस्ट शेअर करत लिहिले आहे – “ते पुन्हा परतले आहेत…”
या वक्तव्यावरून रवीना हिला हा स्फोट दहशतवादी कृत्याशी संबंधित असल्याचा अंदाज आहे, असे स्पष्ट होते. त्याचबरोबर तिने एक्स वरून पीडितांप्रती सहानुभूतीही व्यक्त केली आहे.

सोनू सूदची भावनिक पोस्ट

अभिनेता सोनू सूद याने देखील ट्विटरवरून दिल्ली स्फोटातील मृतांना श्रद्धांजली अर्पण केली. त्याने लिहिले – “दिल्लीतील निर्दोष नागरिकांवर झालेला हा हल्ला अत्यंत वेदनादायी आहे. सर्वांनी मिळून एकजुटीने या संकटाचा सामना करुया.”

थलपति विजयचा दुःखद संदेश

साउथ सुपरस्टार थलपति विजय यानेही एक्सवर पोस्ट करत म्हटले –
“लालकिल्ला मेट्रो स्टेशनजवळ झालेल्या कार स्फोटाची बातमी ऐकून मी अतिशय स्तब्ध झालो आहे. अनेकांनी आपले प्रियजन गमावले. त्यांच्या कुटुंबीयांप्रती माझ्या मनःपूर्वक संवेदना. सर्व जखमींच्या लवकर बरे होण्यासाठी प्रार्थना.”

विनीत कुमार सिंह आणि रिद्धिमा कपूर यांची संवेदना

‘छावा’ चित्रपटातील अभिनेता विनीत कुमार सिंह आणि रणबीर कपूरची बहीण रिद्धिमा कपूर यांनी देखील त्यांच्या इंस्टाग्राम पोस्टमधून स्फोटातील पीडितांप्रती शोक व्यक्त केला आहे.

दिल्लीतील या भीषण घटनेनंतर संपूर्ण देशात हळहळ व्यक्त केली जात असून नागरिकांकडूनही सोशल मीडियावर दुःख आणि रोष दोन्ही व्यक्त होत आहेत. पोलिसांनी या घटनेचा सखोल तपास सुरू केला असून सुरक्षा यंत्रणांना उच्च सतर्कतेवर ठेवण्यात आले आहे.