Deepak Kesarkar : अशोक खरातच्या कृत्याबाबत मला कोणतीही माहिती नाही. माझा काहीही संबंध नसून या घटनेचा निषेध करतो. एखाद्याशी ओळख असणे म्हणजे कृत्यात सहभागी होणे असे होत नाही. मात्र, ठाकरेसेनेचे काही नेते राजकीय द्वेषापोटी माझा संबंध जोडण्याचा प्रयत्न करत आहेत, असे म्हणत शिंदेसेनेचे आमदार दीपक केसरकर यांनी ठाकरेसेनेवर निशाणा साधला. भोंदूबाबा अशोक खरात प्रकरणामुळे सध्या राजकीय वातावरण चांगलेच तापले आहे. अशामध्ये, अशोक खरातसोबत शिवसेना नेते दीपक केसरकर यांचे काही फोटो व्हायरल झाले होते. यावर अखेर त्यांनी आपले मौन सोडले असून पत्रकार परिषद घेत सर्व आरोपांवर खुलासा केला आहे. दीपक केसरकर म्हणाले, अशोक खरात प्रकरणी सध्या महाराष्ट्रात विविध प्रकरण समोर येत आहेत. त्याच्या मंदिराला भेट दिल्यानंतर त्यांच्यासोबत असलेल्या फोटोंबाबतीत वेगवेगळे जे फुलले जात आहे, त्यावर खुलासा करणे हे माझे कर्तव्य आहे. मी स्वतः एक शिवभक्त, एक साईभक्त आहे. वयाच्या पंधराव्या वर्षांपासून शिवमंदिरात जातो. त्याचवेळी माझी आणि अशोक खरातची भेट झाली होती. त्याचेच फोटोदेखील व्हायरल झाले. शंकराच्या पिंडाची पूजा करत असताना अशोक खरातसोबत मी आणि उपमुख्यमंत्री एकनाथ शिंदे दिसत आहेत. तिसरा फोटो अशोक खरातच्या को-ऑपरेटिव्ह संस्थेचे पाहुणे म्हणून मला बोलवले होते तिकडचा फोटो आहे. त्यावेळी अशोक खरात उपस्थित होता. त्यामध्ये, रूपाली चाकणकरदेखील होत्या, असे स्पष्टीकरण त्यांनी यावेळी दिले.
