पुणे : निसर्गसंपन्न आणि ऐतिहासिक स्थळांनी समृद्ध असलेल्या भोर विधानसभा मतदारसंघाला पर्यटन क्षेत्र म्हणून घोषित करण्याची मागणी आमदार शंकर मांडेकर यांनी राज्य सरकारकडे केली आहे. यासंदर्भात त्यांनी उपमुख्यमंत्री अजित पवार आणि पर्यटन मंत्री शंभुराज देसाई यांना निवेदन दिले आहे.

भोर, मुळशी आणि वेल्हे (राजगड) या तीन तालुक्यांचा समावेश असलेल्या या मतदारसंघात रायरेश्वर, तोरणा, राजगड, रोहिडेश्वर, तिकोणा, कोरीगड यांसारखे ऐतिहासिक किल्ले आहेत. तसेच अंधारबन, ताम्हिणी घाट, लवासा, सहारा लेक सिटी, मिल्की रिंग धबधबा, पानशेत, मुळशी, नीरा-देवघर, गुंजवणी आदी धरणे आणि घाटमाथ्यावरील निसर्गरम्य दृश्ये ही पर्यटनासाठी उपयुक्त ठिकाणे आहेत.

धार्मिक पर्यटनाच्या दृष्टीने खारावडे येथील म्हसोबा मंदिर, डावजेतील निळकंठेश्वर, नसरापूरचे बनेश्वर मंदिर, शिरकाई देवी, श्री मेंगाई देवी व मळाई देवी आदी मंदिरे भाविकांचे आकर्षण ठरतात.

“या संपूर्ण भागाचा सर्वंकष पर्यटन विकास आराखडा तयार करून त्यानुसार विकास साधावा. या अनुषंगाने संबंधित विभाग, स्थानिक स्वराज्य संस्था, जिल्हा प्रशासन, पर्यटन तज्ज्ञ आणि इतर हितधारक यांच्याशी समन्वय साधून तातडीने बैठक घेण्यात यावी,” असे आमदार मांडेकर यांनी निवेदनात नमूद केले आहे.

या मागणीस अनुसरून लवकरच भोर विधानसभा मतदारसंघाच्या पर्यटन विकासासाठी दिशा ठरविणारी बैठक घेण्यात यावी, अशी अपेक्षा व्यक्त होत आहे.