ऑस्ट्रेलियाचा दिग्गज क्रिकेटपटू आणि स्फोटक फलंदाज डेव्हिड वॉर्नर (David Warner) आता क्रिकेटनंतर अभिनयाच्या जगात नशीब आजमावताना दिसत आहे. डेव्हिड वॉर्नर (David Warner) हा नेहमीच प्रसिद्धीच्या झोतात असतो. त्याने आता साऊथ अभिनेता नितीन आणि श्रीलीला यांच्या ‘रॉबिनहूड’ या तेलगू चित्रपटातून अभिनय क्षेत्रात पदार्पण केले आहे. या चित्रपटात डेव्हिड वॉर्नरने कॅमिओ केला आहे. त्याच्या अभिनयाचा व्हिडीओ सोशल मीडियावर व्हायरल झाला आहे.

चित्रपटात काय आहे भूमिका?
डेव्हिड वॉर्नरने ‘रॉबिन हूड’ चित्रपटात “डेव्हिड भाई” हे पात्र साकारले आहे. ज्यामध्ये तो एका गँगस्टरच्या भूमिकेत दिसत आहे. या चित्रपटाचे काही व्हिडीओ सोशल मीडियावर समोर आले आहेत, ज्यामध्ये चाहते त्याचा स्वॅग आणि त्याच्या स्फोटक डायलॉगला पसंती देताना दिसत आहेत. वॉर्नरच्या पात्राची खासियत म्हणजे त्याची स्टाईल. त्या भूमिकेत तो एका गुंडसारखा दिसत असून हातात बंदूक घेऊन स्फोटक संवाद बोलताना दिसत आहे. “लॉलीपॉप लाल आहेत, शत्रू मेले आहेत” हा डायलॉग आणि त्याच्या स्वॅगने त्याच्या चाहत्यांना पूर्णपणे वेड लावले आहे.

‘या’ पात्रासाठी किती घेतली फी
डेव्हिड वॉर्नरने रॉबिनहूड चित्रपटाच्या अवघ्या 3 मिनिटांच्या सीनसाठी भरमसाठ फी घेतली आहे. त्याने एका दिवसाच्या शूटिंगसाठी 1.25 कोटी रुपये फी मागितली होती. अशाप्रकारे डेव्हिड वॉर्नरने या छोट्या भूमिकेसाठी एकूण अडीच कोटी रुपये घेतले.

डेव्हिड वॉर्नरची कारकीर्द (David Warner) 
कसोटी – सामने : ११२, सरासरी: ४४.५९ धावा : ८७८६, शतक/अर्धशतक : २६/३७.
एकदिवसीय – सामने : १६१, सरासरी: ४५.३०. धावा : ६९३२, शतक/अर्धशतक : २२/३३.
टी-२० – सामने : ११०, सरासरी: ३३.४३, धावा : ३,२७७, शतक/अर्धशतक : १/२८.