Daund Suicide Case – दौंड येथील मुद्रांक विक्रेते व ज्येष्ठ नागरिकाची फसवणूक करून आत्महत्येस प्रवृत्त केल्याप्रकरणी १३ जणांविरुद्ध गुन्हा दाखल करण्यात आला आहे. याप्रकरणी अव्दैत विवेक गटणे (वय ३७, व्यवसाय खाजगी नोकरी, मूळ रा. महादेव गल्ली, दौंड, सध्या रा. क्विन्स टाउन, चिंचवड) यांनी फिर्याद दिली आहे. पोलिसांनी दिलेल्या माहितीनुसार, फिर्यादी अव्दैत विवेक गटणे यांचे वडील विवेक शंकर गटणे (वय ७२, रा. महादेव गल्ली, दौंड) यांना आरोपींनी “फायनान्स कंपनीतील ओळखीचे कर्मचारी” असल्याचे सांगून मागील एक वर्षापासून त्यांच्याकडून वेळोवेळी पैसे, सोने व मौल्यवान वस्तू घेतल्या. मात्र घेतलेल्या वस्तू व रक्कम परत न करता त्यांची फसवणूक करण्यात आली. तसेच पैसे व मौल्यवान वस्तू परत मागितल्यावर आरोपींनी विवेक गटणे यांना आर्थिक, शारीरिक व मानसिक त्रास दिल्याचा आरोप फिर्यादीत करण्यात आला आहे. या त्रासाला कंटाळून त्यांनी आत्महत्या केली असून, त्यांच्या मृत्यूस कारणीभूत ठरल्याचे तक्रारीत नमूद करण्यात आले आहे. मयत विवेक गटणे यांनी मृत्यूपूर्वी आरोपींची नावे एका वहीत लिहून ठेवल्याचेही फिर्यादीत म्हटले आहे. या प्रकरणी संजय भिमराव बारवकर, अरीफ शमशुद्दीन शेख, प्रकाश आबाजी भालेराव, अख्तर अहमद शेख, आदित्य सुधीर जगताप, शंकर रमेश वाघमारे, राजू भीमराव बारवकर तसेच शितोळे, सोनवणे, चोप्रा, कुलकर्णी (मॅडम), शिंदे व मुल्ला (मुंबई) यांच्याविरुद्ध गुन्हा दाखल करण्यात आला आहे. या गुन्ह्याचा पुढील तपास सहाय्यक पोलीस निरीक्षक रूपेश कदम करीत आहेत.
